පාකිස්ථානය සහ ශ්‍රී ලංකාව අතර ක්‍රිකට් සබඳතාවල දීර්ඝ ඉතිහාසය, අතීතයේ පවා පැවති ආරක්ෂක අභියෝග සහ ඉස්ලාමාබාද්හි දැනට රැඳී සිටින ශ්‍රී ලංකා කණ්ඩායම සම්බන්ධ වත්මන් තත්ත්වය අතර සමානකම් පිළිබඳ පාකිස්ථානයේ හිටපු ක්‍රිකට් නායක රෂීඩ් ලතීෆ් සටහනක් තබා තිබේ.

1994 දී පාකිස්ථානය ශ්‍රී ලංකාවේ සිදුකළ සංචාරය ලතීෆ් එහිදී සිහිපත් කළේය.

ශ්‍රී ලංකා රජයේ හමුදා සහ එල්ටීටීඊය අතර දැඩි ගැටුම් මධ්‍යයේ පාකිස්ථාන කණ්ඩායම එහිදී ටෙස්ට් තරඟ තුනක් සහ එක්දින තරඟ තුනක් ක්‍රීඩා කළේය.

කොළඹ පැවති දෙවැනි ටෙස්ට් තරඟයෙන් අනතුරුව, බෝම්බ පිපිරීමක් නිසා ඇඳිරි නීතිය පැනවීම හේතුවෙන් තුන්වැනි ටෙස්ට් තරඟය අවලංගු කිරීමට සිදුවිය.

එවැනි අනතුරුදායක තත්ත්වයක් තිබියදීත්, පාකිස්ථාන කණ්ඩායම කොළඹ රැඳී සිටියේය.

රජය සමඟ සාකච්ඡා කර පාකිස්ථාන ක්‍රිකට් මණ්ඩලය ගත් තීරණය “ක්‍රීඩකයන් විසින් ඉතා බැරෑරුම් ලෙස සළකනු ලැබුවා” යනුවෙන් ලතීෆ් සඳහන් කර තිබේ.

අවලංගු කරන ලද ටෙස්ට් තරඟය වෙනුවට එක්දින තරඟ දෙකක් තරගාවලියට එකතු ලැබිණි.

අවසානයේ පාකිස්ථානය ටෙස්ට් තරඟාවලිය 2–0ක් සහ එක්දින තරඟාවලිය 4–1ක් ලෙස ජයග්‍රහණය කළේය.

1996 මුල් භාගය ද ලතීෆ් සිහිපත් කළේය.

එය ද ශ්‍රී ලංකාව නැවතත් නිතර නිතර බෝම්බ ප්‍රහාර, මරාගෙන මැරෙන ප්‍රහාර සහ ඇඳිරි නීතිය ආදියෙන් අභියෝගවලට මුහුණ දුන් සමයකි.

ක්‍රිකට් ලෝක කුසලානය ඉන්දියාව, පාකිස්ථානය සහ ශ්‍රී ලංකාව එක්ව පැවැත්වීමට නියමිතව තිබියදී, ඕස්ට්‍රේලියාව සහ බටහිර ඉන්දීය කොදෙව් යන රටවල් දෙකම කොළඹට පැමිණීම ප්‍රතික්ෂේප කර තිබිණි.

ඊට ප්‍රතිචාර වශයෙන්, පාකිස්ථානය සහ ඉන්දියාව ඒකාබද්ධ කණ්ඩායමක් පිහිටුවාගෙන ශ්‍රී ලංකාවට පැමිණියේ සහයෝගීතාවය පෙන්වීම සඳහා ය.

කණ්ඩායමට මොහොමඩ් අසාරුදීන්, සචින් තෙන්ඩුල්කාර්, සයීඩ් අන්වර්, වසීම් අක්‍රම්, අනිල් කුම්බ්ලේ, රෂීඩ් ලතීෆ්, වකාර් යුනිස්, අජේ ජඩේජා, ඉජාස් අහමඩ් සහ ආමර් සොහේල් ඇතුළත් වූහ.

එවක අගමැතිනි චන්ද්‍රිකා බණ්ඩාරනායක කුමාරතුංග මෙම ක්‍රීඩකයන් හමුවූ බවත්, තරගයෙන් පසු දෙරටටම ස්තූති කරමින් ශ්‍රී ලංකා නායක අර්ජුන රණතුංග හැඟීම්බරව අදහස් දැක්වූ බවත් ලතීෆ් සඳහන් කළේය.

1996 දී ලාහෝර්හිදී පැවති ලෝක කුසලානය ශ්‍රී ලංකාව දිනා ගත් අතර, එහිදී රණතුංගට කුසලානය ප්‍රදානය කරනු ලැබුවේ එවක අගමැතිනි බෙනාසීර් භූතෝ විසිනි.

2009 මාර්තු 3 වැනිදා ලාහෝර්හිදී ශ්‍රී ලංකා කණ්ඩායමට ප්‍රහාරයක් එල්ල වූ අතර එය දශකයක් පුරා පාකිස්ථානයට අන්තර්ජාතික ක්‍රිකට් තරග නොලැබීමට හේතු විය.

ශ්‍රී ලංකා කණ්ඩායම ඉස්ලාමාබාද්හි සිටියදී පසුගියදා වූ සිදුවීම පිළිබඳ මෙනෙහි කරමින්, ඇතැම් ක්‍රීඩකයන් කණස්සල්ල පළ කර කඩිනමින් නැවත පැමිණීමට අවශ්‍ය යැයි ඉල්ලා සිටි බවත්, එය පාකිස්ථාන ක්‍රිකට් මණ්ඩලයට දුෂ්කරතා ඇති කළ බවත් ඔහු පැවසීය.

පාකිස්ථාන ක්‍රිකට් මණ්ඩලය සහ පාකිස්ථාන රජය වහාම ශ්‍රී ලංකා නිලධාරීන් සමඟ රාජ්‍ය තාන්ත්‍රික සාකච්ඡාවල නිරත වූ බවත්, පසුව ශ්‍රී ලංකා ක්‍රිකට් කණ්ඩායම අඛණ්ඩව සංචාරයේ යෙදෙන බව තහවුරු කරමින් නිවේදනයක් නිකුත් කළ බවත් ඔහු පැවසීය.

“පාකිස්ථානයට ක්‍රිකට් ඉතා වැදගත්” යැයි ලතීෆ් සඳහන් කළේය.

ශ්‍රී ලංකාව තවමත් ශක්තිමත් තරඟකාරිත්වයක් ලබා දිය හැකි කණ්ඩායමක් බව ඔහු පැවසීය.

2009 ප්‍රහාරයෙන් පසු පාකිස්ථානයට වසර නවයකට ආසන්න කාලයක් දේශීය ක්‍රිකට් අහිමි වුවද, එතැන් සිට ඔවුන් ඕස්ට්‍රේලියාව, එංගලන්තය, ශ්‍රී ලංකාව, සිම්බාබ්වේ, දකුණු අප්‍රිකාව, බටහිර ඉන්දීය කොදෙව් සහ නවසීලන්තයට නිතිපතා සත්කාරකත්වය ලබා දී ඇති බව ඔහු පෙන්වා දුන්නේය.