හිටපු ක්‍රිකට් ක්‍රීඩක අරවින්ද ද සිල්වා සහ ඔහුගේ බිරිඳ වන ප්‍රියංගා අනුෂ්කා විජේනායක අත්අඩංගුවට ගැනීම සඳහා කොළඹ කොටුව මහෙස්ත්‍රාත් පසන් අමරසේන අද වරෙන්තු නිකුත් කළේය.

ශ්‍රීලන්කන් ගුවන් සමාගමේ හිටපු ප්‍රධාන විධායක කපිල චන්ද්‍රසේන සහ ඔහුගේ බිරිඳ සම්බන්ධ එයාර්බස් ගනුදෙනුව පිළිබඳ නඩුව අද උදෑසන කොළඹ කොටුව මහෙස්ත්‍රාත් අධිකරණයේදී කැඳවූ අවස්ථාවේදී මෙම නියෝගය නිකුත් කෙරිණි.

මෙම සිද්ධිය සම්බන්ධයෙන් සැකකරුවෙකු ලෙස නම් කර සිටි කපිල චන්ද්‍රසේන මේ වන විට මියගොස් ඇත. මෙම නඩුව සම්බන්ධයෙන් ඇප මත මුදාහැර සිටින සහ දැනට විදේශගතව සිටින ඔහුගේ බිරිඳට ඇප ලබා දී තිබුණේ හිටපු ජාත්‍යන්තර ක්‍රිකට් ක්‍රීඩක අරවින්ද ද සිල්වා සහ ඔහුගේ බිරිඳ වන ප්‍රියංගා අනුෂ්කා විජේනායක යන අය ඇපකරුවන් ලෙස ඉදිරිපත් වීමෙනි.

අද දිනයේ නඩුව කැඳවූ අවස්ථාවේදී අදාළ සැකකාරිය අධිකරණයේ පෙනී නොසිටියාය. ඇපකරුවන් ද අධිකරණය හමුවේ පෙනී නොසිටි බැවින් මහෙස්ත්‍රාත්වරයා ඔවුන්ට එරෙහිව වරෙන්තු නිකුත් කළේය.

අරවින්ද ද සිල්වාගේ මව මියගොස් ඇති බවත් ඇයගේ අවසන් කටයුතු අද දින සිදු කිරීමට නියමිතව තිබූ බවත් හේතුවෙන් ඔවුන්ට අධිකරණයේ පෙනී සිටීමට නොහැකි වූ බව ඇපකරුවන් වෙනුවෙන් පෙනී සිටි නීතිඥවරු අධිකරණයට දැනුම් දුන්හ.

වරෙන්තු ආපසු කැඳවීම සඳහා කරුණු සලකා බලන අවස්ථාවේදී ඊට අදාළ ලේඛන ඉදිරිපත් කරන ලෙසත්, සිදුවී ඇති තත්ත්වය අධිකරණයේ අවධානයට යොමු කරන ලෙසත් මහෙස්ත්‍රාත්වරයා නියෝග කළේය.