August 23, 2025
මත්ද්‍රව්‍ය භාවිතයෙන් සති දෙකකට පසුව පවා මුත්‍රා පරීක්ෂණ මගින් එය හඳුනා ගත හැකි බව බස් රථ රියදුරන් ඇතුළු සියලු රියදුරන් තේරුම් ගත යුතු බව පේරාදෙණිය ශික්ෂණ රෝහලේ අධිකරණ වෛද්‍ය නිලධාරී වෛද්‍ය පාලිත බණ්ඩාර සුබසිංහ අවධාරණය කරයි.
මාර්ග අනතුරකින් පසු, රියදුරකු අත්අඩංගුවට ගෙන වෛද්‍ය නිලධාරියකුට ඉදිරිපත් කළ විට, රියදුරු ඊට ආසන්න දිනකදී මත්ද්‍රව්‍ය භාවිතානොකළ බව සත්‍යවාදීව ප්‍රකාශ කළත් මුත්‍රා පරීක්ෂණයකින් මත්ද්‍රව්‍ය භාවිතය අනාවරණය විය හැකි බව ඔහු පැහැදිලි කළේය.
මෙයට හේතුව මත්ද්‍රව්‍යවල අංශු සති දෙකක් දක්වා ශරීරයේ පවතින බැවිනි.
මත්පැන් පානය කර රිය පැදවීම රුධිර මධ්‍යසාර සාන්ද්‍රණය අනුව තීරණය වන බව වෛද්‍ය සුබසිංහ පැහැදිලි කළේය.
රුධිරයේ මිලිලීටර් 100කට මධ්‍යසාර මිලිග්‍රෑම් 80 ඉක්මවන්නේ නම් රියදුරකු නීත්‍යනුකූලව වැරදිකරුවකු ලෙස සැළකේ.
මෙම මිනුම හුස්ම ගැනීමේ යන්ත්‍ර පරීක්ෂණයක් හෝ රජයේ වෛද්‍ය නිලධාරියකු විසින් ගන්නා ලද රුධිර සාම්පලයක් හරහා ලබාගත හැකිය.
මට්ටම අඩු නම්, බීමතින් රිය පැදවීම සම්බන්ධයෙන් රියදුරුට චෝදනා කළ නොහැක.
තවදුරටත් පැහැදිලි කරමින් ඔහු සඳහන් කළේ , අධිකරණ වෛද්‍ය නිලධාරීන් මත්ද්‍රව්‍ය භාවිතය හඳුනා ගැනීම සඳහා බහු-ඖෂධ පරීක්ෂණයක් භාවිත කරන බවයි.
එම පරීක්ෂණයෙන් පරිභෝජනය කරන ලද ඖෂධ ප්‍රමාණය හෝ පරිභෝජනය කළ නිශ්චිත වේලාව තීරණය කළ නොහැකි වුවද, මුත්‍රාවල ඖෂධ පවතින බව තහවුරු කරන ගුණාත්මක ප්‍රතිඵලයක් සපයයි.
රියදුරෙකු මත්ද්‍රව්‍ය භාවිත කර ඇති බව තහවුරු කිරීමට එවැනි සාක්ෂි අධිකරණයට ප්‍රමාණවත් වේ.
“රියදුරෙක් අනතුරකට සතියකට හෝ දෙකකට පෙර කංසා හෝ මෙතම්ෆෙටමින් (අයිස්) භාවිත කළත්, ඒ අවස්ථාවේ ඔවුන් මත්ද්‍රව්‍ය භාවිත කර නොසිටි බව අවධාරණය කළත්, පරීක්ෂණයෙන් ධනාත්මක ප්‍රතිඵලයක් ලැබෙන්න පුළුවන්. නීතිය ඉදිරියේ, ඔවුන් වගකිව යුතු බවට පත් කිරීමට මෙය ප්‍රමාණවත් බව රියදුරන් දැන සිටිය යුතුයි,” යනුවෙන් වෛද්‍ය සුබසිංහ අවධාරණය කළේය.
