ජනතාව නොමඟ යවමින් AI මගින් ජනනය කරන ලද චිත්‍රපට ප්‍රචාරක පට ප්‍රචාරය කිරීම සම්බන්ධයෙන් චෝදනා ලැබ සිටින ඉහළ පෙළේ නාලිකා දෙකක් YouTube විසින් අත්හිටුවා තිබේ.

ඉන්දියාව පදනම් කරගත් Screen Culture සහ එක්සත් ජනපදය පදනම් කරගත් KH Studio යන නාලිකාවලට මිලියන දෙකකට වඩා ග්‍රාහකයන් සිටි අතර YouTube වේදිකාවෙන් ඉවත් කිරීමට පෙර එහි වීඩියෝ බිලියනයකට වඩා නැරඹුම් රැස්කර ගෙන තිබිණි.

මාධ්‍ය වාර්තා කර ඇත්තේ මෙම නාලිකා පිටුපස සිටින නිර්මාණකරුවන් ව්‍යාජ චිත්‍රපට ප්‍රචාරක පට ජනනය කිරීම සඳහා කෘත්‍රිම බුද්ධිය භාවිත කර ඇති අතර, බොහෝ විට AI මගින් නිර්මාණය කරන ලද දර්ශන ප්‍රකාශන හිමිකම් සහිත පවතින චිත්‍රපටවල දර්ශන සමඟ මිශ්‍ර කර ඇති බවයි.

අදාළ වීඩියෝ ඉදිරිපත් කර ඇත්තේ බොහෝ නරඹන්නන් ඒවා නිල ස්ටුඩියෝ නිකුතු බව විශ්වාස කිරීමට හේතුවන ආකාරයටය.

YouTube මීට පෙර ප්‍රතිපත්ති උල්ලංඝනය කිරීම් සඳහා අදාළ නාලිකාවල මුදල් අහෝසි කර තිබිණි.

කෙසේවෙතත්, නිර්මාණකරුවන් විසින් අදාළ වීඩියෝ නිල නොවන බව සඳහන් කිරීමෙන් පසු වේදිකාව විසින් ගිණුම් අවසන් කිරීමේ අවසාන පියවර ගෙන තිබේ.

YouTube ප්‍රකාශකයකු පැවසුවේ නාලිකා නොමඟ යවන අන්තර්ගතය සහ රැවටිලිකාර පිළිවෙත් පිළිබඳ සමාගමේ ප්‍රතිපත්ති උල්ලංඝනය කළ බවයි.

නිල ද්‍රව්‍ය අනුකරණය කරන සහ ප්‍රේක්ෂකයන් නොමඟ යවන AI මගින් ජනනය කරන ලද අන්තර්ගතයන් පිළිබඳ විනෝදාස්වාද කර්මාන්තය තුළ මතුවෙමින් තිබෙන කණස්සල්ල එම ගිණුම් වසා දැමීමෙන් පිළිබිඹු වේ.

YouTube සහ අනෙකුත් ප්‍රධාන වේදිකා AI මගින් ජනනය කරන ලද මාධ්‍ය නියාමනය කිරීම සඳහා ඉහළ යමින් තිබෙන පීඩනයකට මුහුණ දෙන බැවින්, විශේෂයෙන් ප්‍රකාශන හිමිකම් ඇති කෘති හෝ තමන් අව්‍යාජ යැයි වැරදි ලෙස නිරූපණය කරන අන්තර්ගතයන්ට එරෙහිව මෙම පියවර ගෙන ඇත.