චන්කානෙයි සුරාබදු කාර්යාලයට අනුයුක්ත නිලධාරීන් තිදෙනෙකු මත්ද්‍රව්‍ය කාර්යාංශයේ නිලධාරීන් ලෙස පෙනීසිටිමින් රුපියල් මිලියන 2ක කප්පම් මුදලක් ලබාගැනීමට උත්සාහ කළ බවට චෝදනා එල්ල වී ඇති අතර, උතුරු පළාත් අපරාධ කොට්ඨාශය විසින් ඔවුන්ව අත්අඩංගුවට ගෙන තිබේ.

උතුරු පළාත් අපරාධ කොට්ඨාශයේ ස්ථානාධිපති එස්. සංජීවට අනුව, ඊයේ (29) සවස බුද්ධි තොරතුරු මත සිදුකරන ලද වැටළිමකදී මෙම අත්අඩංගුවට ගැනීම සිදුකර ඇත.

පොලිසිය පැවසුවේ, සුරාබදු නිලධාරීන් තිදෙනා මීට පෙර මාදගල් වෙරළ තීරයකදී නීතිවිරෝධී මත්පැන් සමඟ පුද්ගලයකු රඳවාගෙන මත්ද්‍රව්‍ය කාර්යාංශයේ නිලධාරීන් බව ව්‍යාජ ලෙස ප්‍රකාශ කර ඇති බවයි.

පසුව සැකකරු චන්කානෙයි සුරාබදු කාර්යාලයට ගෙනගොස්, එහිදී නිලධාරීන් ඔහුගේ ජංගම දුරකථනය භාවිත කර ඔහුගේ සහෝදරියට කතාකර ඔහු නිදහස් කිරීම සඳහා රුපියල් මිලියන 2 ක් ඉල්ලා සිටි බව වාර්තා වේ.

පසුව කාන්තාව උතුරු පළාත් අපරාධ කොට්ඨාශයට මේ පිළිබඳව දැනුම්දී ඇති අතර, එහිදී සිදුකරන ලද හදිසි මෙහෙයුමකදී සැකකරුවන් තිදෙනා අත්අඩංගුවට ගෙන තිබේ.

අත්අඩංගුවට ගත් සැකකරුවන් වයස අවුරුදු 48 ක් වන සුරාබදු ප්‍රධාන පරීක්ෂකවරයකු සහ වයස අවුරුදු 36 සහ 32 ක් වන සුරාබදු පරීක්ෂකවරුන් දෙදෙනෙකු වේ.

ඔවුන් අධිකරණයට ඉදිරිපත් කිරීමට නියමිතය.