October 18, 2025
දේශීය ක්‍රිකට් ක්‍රීඩකයන් තිදෙනෙකු ප්‍රහාරයකින් මියයෑමෙන් පසු ඇෆ්ගනිස්ථානය ලබන මාසයේ පාකිස්තානය සහ ශ්‍රී ලංකාව සමඟ පැවැත්වෙන තරගාවලියෙන් ඉවත් වී ඇති බව එරට ක්‍රිකට් මණ්ඩලය සිකුරාදා පැවසීය.
ක්‍රීඩකයන් උර්ගුන් සිට පකිස්ථාන දේශසීමාවේ නැගෙනහිර පක්ටිකා පළාතේ ෂරානා දක්වා මිත්‍රශීලී තරඟයකට සහභාගී වීමට ගමන් කළ බව වාර්තා වේ.
“උර්ගුන් වෙත ආපසු පැමිණි පසු, ඔවුන් ඉලක්ක කර ගත්” බව එහි එරට වාර්තා සඳහන් කරන අතර, එය “පකිස්ථාන පාලනය විසින් සිදුකරන ලද බියගුලු ප්‍රහාරයක්” ලෙස ඇෆ්ගනිස්ථානය විස්තර කර ඇත.
මෙම ක්‍රීඩකයින් තිදෙනා “කබීර්, සිබ්ගතුල්ලා සහ හරූන්” ලෙස හඳුන්වා ඇති අතර, ප්‍රහාරයෙන් තවත් පස්දෙනෙකු ද මියගිය බව වාර්තා වේ.
“මෙය ඇෆ්ගනිස්ථානයේ ක්‍රීඩා ප්‍රජාවට, එහි ක්‍රීඩක ක්‍රීඩිකාවන්ට සහ ක්‍රිකට් පවුලට විශාල පාඩුවක් ලෙස සලකන” බවත්, “වියෝගි පවුල්වලට ගැඹුරු ශෝකය සහ සහයෝගීතාවය” ප්‍රකාශ කරන බවත් ඇෆ්ගන් ක්‍රිකට් පාලක මණ්ඩලය පවසයි.
“මියගිය ක්‍රීඩකයන්ට ගරුකිරීමක් ලෙස” ලබන මාසයේ පැවැත්වෙන තරගාවලියෙන් ඉවත් වීමට තීරණය කළ බව ඇෆ්ගන් ක්‍රිකට් පාලක මණ්ඩලය සඳහන් කරයි.
එරට අන්තර්ජාතික ක්‍රීඩකයකු වන මොහොමඩ් නබි මෙම මරණ සම්බන්ධයෙන් මෙසේ පවසයි “මෙම සිදුවීම සමස්ත ඇෆ්ගන් ක්‍රිකට් පවුලට සහ සමස්තයක් වශයෙන් ජාතියටම ඛේදවාචකයකි.”
