2024 මහ මැතිවරණයේ දී ඡන්දය ප්‍රකාශ කරන ආකාරය සහ කැමති අපේක්ෂකයන් තෝරා ගන්නා ආකාරය පිළිබඳ මාර්ගෝපදේශ මැතිවරණ කොමිසම නිකුත් කර තිබේ.

කොමිෂන් සභාවට අනුව සෑම ඡන්ද දායකයකුටම එක් ඡන්දයක් ඇති අතර එය දේශපාලන පක්ෂයකට හෝ ස්වාධීන කණ්ඩායමකට ලබා දිය හැකිය.

ඡන්දය ප්‍රකාශ කිරීම සඳහා ඔබ සහාය දක්වන පක්ෂයේ ලකුණ අසල හෝ ස්වාධීන කණ්ඩායමේ අංකය සහ ලකුණ ඉදිරියෙහි ‘x’ ලකුණ යෙදිය යුතු බව කොමිසම ප්‍රකාශ කළේය.

තවද, ඡන්දදායකයන්ට තමන් තෝරාගත් පක්ෂයෙන් හෝ කණ්ඩායමෙන් අපේක්ෂකයන් තිදෙනෙකු දක්වා තෝරා ගත හැකිය.

ඒ අනුව ඡන්ද දායකයන්ට ඡන්ද පත්‍රිකාව අවසානයේ එක් එක් අපේක්ෂකයාගේ අංකය අසල ‘x’ ලකුණ යෙදිය හැකිය.

යමෙක් එක් පක්ෂයකට හෝ එක් කණ්ඩායමකට වඩා වැඩි ගණනකට ඡන්දය ප්‍රකාශ කරන්නේ නම් හෝ ‘x’ ලකුණ හැර වෙනත් ලකුණක් භාවිත කරන්නේ නම් එම ඡන්ද පත්‍රිකාව ප්‍රතික්ෂේප කරන බවද මැතිවරණ කොමිසම ප්‍රකාශ කළේය.

මේ අතර, ඔක්තෝබර් 30 වැනිදා ආරම්භ වූ 2024 මහ මැතිවරණයට අදාළ තැපැල් ඡන්ද සලකුණු කිරීම මේ වන විට තුන්වැනි දිනටත් ක්‍රියාත්මක වේ.