October 9, 2025
අල්ලස් හෝ දූෂණ චෝදනා විමර්ශන කොමිෂන් සභාවේ අධ්‍යක්ෂ ජනරාල් රංග දිසානායකට එරෙහිව විපක්ෂය පාර්ලිමේන්තු මන්ත්‍රී චාමර සම්පත් දසනායක තවත් බරපතල චෝදනාවක් එල්ල කළේ, ඔහුගේ බිරිඳ කලක් මහබැංකු අධිපති අර්ජුන මහේන්ද්‍රන් යටතේ සේවය කළ බව පවසමිනි.
පාර්ලිමේන්තුවේදී අදහස් දක්වමින් මන්ත්‍රීවරයා පැවසුවේ, අල්ලස් කොමිසමේ අධ්‍යක්ෂ ජනරාල් රංග දිසානායක ජනමාධ්‍ය හමුවේ නිතර පෙනීසිටීමෙන් තම භූමිකාව ඉක්මවා යන බවයි. “දැන්, රංග දිසානායක මහත්තයා මාධ්‍යවල ඉන්නවා. අධ්‍යක්ෂ ජනරාල්වරයෙක් විදිහට ඔහුට මාධ්‍යවල ඉන්න බැහැ”
හිටපු අධිපති අර්ජුන මහේන්ද්‍රන් සම්බන්ධ මහබැංකු බැඳුම්කර වංචාව ගැන සඳහන් කරමින් මන්ත්‍රී චාමර සම්පත් දසනායක මෙසේ පැවසීය; “2017 දී කොළඹ මහේස්ත්‍රාත්වරයා ලෙස සේවය කළේ කවුද සහ අර්ජුන මහේන්ද්‍රන්ගේ විදේශ ගමන් බලපත්‍රය නිදහස් කිරීමට අනුමැතිය දුන්නේ කවුද යන්න රංග දිසානායක මහත්තයා පැහැදිලි කළ යුතුය”. රංග දිසානායකගේ පළමු සහ දෙවැනි භාර්යාවන් දෙදෙනාම මහබැංකුවේ සේවය කළ බවත්, එවකට මහ බැංකු අධිපති අර්ජුන මහේන්ද්‍රන් යටතේ ඔහුගේ දෙවැනි බිරිඳ දැරූ තනතුර හෙළිකරන ලෙසත් ඔහු තවදුරටත් අභියෝග කළේය.
තමන් දැනට අධිකරණය හමුවේ නඩු තුනකට මුහුණ දී සිටින බවත්, තමාගේ මෙම නවතම ප්‍රකාශවලින් පසුව එම නඩු තුනටම කඩිනමින් අධිචෝදනා ලැබෙනු ඇතැයි අපේක්ෂා කරන බවත් මන්ත්‍රීවරයා සඳහන් කළේය.
