උතුරේ වැසියන්ට බත්තරමුල්ලේ පිහිටි ප්‍රධාන කාර්යාලයට හෝ වවුනියාවේ ප්‍රාදේශීය කාර්යාලයට ගමන් කිරීමකින් තොරව සිය ගමන් බලපත්‍ර ලබා ගැනීමට හැකිවන පරිදි යාපනයේ ආගමන හා විගමන දෙපාර්තමේන්තුවේ ප්‍රාදේශීය කාර්යාලය ජනාධිපති අනුර කුමාර දිසානායක විසින් සඳුදා විවෘත කරන ලදී.

ප්‍රධාන කාර්යාලයේ කාර්ය මණ්ඩලයේ වැඩ බර මෙමගින් අඩු වේ.

විවෘත කළ දින සිට, යාපනය දිස්ත්‍රික් ලේකම් කාර්යාලයේ විදේශ ගමන් බලපත්‍ර කාර්යාලයට දිනකට අයදුම්පත් 350ක් ලැබෙමින් පවතින අතර, ඉන් 250ක් පමණ එක්දින සේවාව සඳහා වේ.

අයදුම්කරුවන්ට උදේ 7.00 සිට පස්වරු 2.00 දක්වා කිසිදු කරදරයකින් තොරව තම ලේඛන භාර දී දවස තුළම තම ගමන් ලියකියවිලි ලබාගත හැකිය.

ජනාධිපතිවරයා විසින් කාර්යාලයේදී නිරාවරණ කරන ලද සමරු ඵලකය ද උත්සවයේදී බොහෝ දෙනෙකුගේ අවධානයට ලක් විය.

අතීතයේ මෙන් නොව, ජනාධිපතිවරුන්ගේ සහ විෂය භාර අමාත්‍යවරුන්ගේ නම් ත්‍රෛභාෂා ඵලකයේ අතුරුදහන් වී තිබූ අතර, එහි සඳහන් වූයේ, “ශ්‍රී ලංකා ප්‍රජාතන්ත්‍රවාදී සමාජවාදී ජනරජයේ මහජන මුදලින් ඉදිකරන ලද ආගමන හා විගමන දෙපාර්තමේන්තුවේ යාපනය ප්‍රාදේශීය කාර්යාලය, 2025 සැප්තැම්බර් 1 වැනි දින ගරු ජනාධිපතිතුමා විසින් විවෘත කරන ලදී” යන්න පමණි.