දේශපාලන පක්ෂ එක්ව යෝජනාවක් ඉදිරිපත් කළහොත් තමා ලබන වසරේ පැවැත්වීමට නියමිත ජනාධිපතිවරණයට පොදු අපේක්ෂකයකු ලෙස ඉදිරිපත්වීමට සූදානම් බව හිටපු ක්‍රීඩා ඇමැති රොෂාන් රණසිංහ පවසයි.

“දේශපාලන කණ්ඩායම් මාව 2024 පොදු අපේක්‍ෂකයා ලෙස නම් කිරීමට යෝජනාවක් ඉදිරිපත් කළහොත් මම එය නොපමාව භාරගන්නවා” ඔහු සඳහන් කරයි.

ශ්‍රී ලංකාවට අවශ්‍ය සියල්ල රට සතුව පවතින නිසා, මෙරටට අවශ්‍ය වන්නේ, නිසි කළමනාකාරීත්වය සහ කාර්යක්ෂම භාවිතය සමඟින්, මෙම සම්පත්වලට නිසි වටිනාකමක් ලබාදීම බව ඔහු පෙන්වාදෙයි.

කෙසේ වෙතත්, සාධාරණ සංවර්ධනයක් සහතික කිරීම සඳහා ශක්තිමත් දූෂණ විරෝධී ක්‍රියාමාර්ගවල තීරණාත්මක අවශ්‍යතාවය හෙතෙම අවධාරණය කරයි.

වසර ගණනාවක් තිස්සේ රට පීඩාවට පත්කර ඇති වංචා දූෂණ ඵලදායී ලෙස මර්දනය කිරීම සඳහා වත්මන් විගණන ක්‍රියාවලිය සැලකිය යුතු ලෙස ශක්තිමත් කළ යුතු බව ඔහු පවසයි.