ශ්‍රී ලංකාවට බලපෑ ස්වාභාවික ව්‍යසනයෙන් තේ කර්මාන්තයට වූ බලපෑම යථා තත්ත්වයට පත්වීමට මාස ගණනක් ගතවනු ඇතැයි කොළඹ තේ වෙළඳුන්ගේ සංගමය පවසයි.

ව්‍යසනය හේතුවෙන් හානි වූ යන්ත්‍රෝපකරණ අලුත්වැඩියා කිරීම සඳහා විදේශගත කිරීමට සිදුවීම සහ මාර්ගවලට සිදුව ඇති හානිය නිසා අපනයනයට තේ බෙදා හැරීමට බලපෑම් එල්ල විය හැකි බව එම සංගමය සඳහන් කරයි.

“වසරකට රුපියල් බිලියන 110ක පමණ අපනයන වටිනාකමක් ඇති තේ අපනයනය කරන සමාගම් 30ක් තිබෙනවා, ඒවා නැවත ක්‍රියාත්මක වීමට සති දෙකක් හෝ තුනක් ගතවෙයි. එම කාලය තුළ තේ කර්මාන්තයට පාඩු වෙනවා. හානියට පත් යන්ත්‍රෝපකරණ යථා තත්ත්වයට පත් කිරීමට මාස කිහිපයක් ගතවෙන්න පුළුවන්, සමහර යන්ත්‍ර ප්‍රතිසංස්කරණය කිරීමට තාක්ෂණය ශ්‍රී ලංකාව සතුව නැති නිසා අපට ඒවා විදේශගත කිරීමට සිදුවනවා,” යනුවෙන් කොළඹ තේ වෙළඳුන්ගේ සංගමයේ සභාපති ලුෂාන්ත ද සිල්වා පැවසුවේය.

තේ බෑග් නිෂ්පාදනය කරන ඇතැම් යන්ත්‍රවලට හානි සිදුවී ඇති බවත්, සම්පූර්ණ පරීක්ෂාවකින් පසු මුළු හානිය තක්සේරු කරන බවත් සභාපතිවරයා පැවසීය.

කර්මාන්තය නැවත පණ ගැන්වීමට රජයට සහාය වීමට සිදුවනු ඇති බව ඔහු තවදුරටත් පැවසීය.

ඔහුට අනුව, ඇතැම් ප්‍රදේශ තවමත් අක්‍රියව පවතින බැවින් වගා හා ඉඩම් හානිය තවමත් තක්සේරු කර නොමැත.

කෙසේවෙතත්, එය නිෂ්පාදනයට දැඩි ලෙස බල නොපාන අතර සතියකින් සාමාන්‍ය තත්ත්වයට පත් වනු ඇති බව ඔහු පැවසීය.

තේ වතු හිමියකු වන සමන්ත දොඩන්ගොඩ පවසන්නේ නිෂ්පාදනය මන්දගාමී නොවනු ඇතත් අභියෝගය වන්නේ මේ දිනවල තේ දළු නෙළන්නන් නොපැමිණීම බවයි.

ආරක්ෂිත වන තුරු එම කඳුකරයට යෑමට ඔවුන් බිය වනු ඇති බව ඔහු සඳහන් කළේය.

මාර්ග යටිතල පහසුකම් නැවත ඇති කිරීම රජය මුහුණ දෙන විශාලතම ගැටලුව වනු ඇති බව සමන්ත පැවසීය.