August 23, 2025
මෙරට ඇති රූපලාවන්‍ය නිෂ්පාදන විශාල ප්‍රමාණයක ක්ෂුද්‍ර ප්ලාස්ටික්, පොලිඑතිලීන් (PE) සහ පොලිප්‍රොපිලීන් (PP) අඩංගු බව පර්යේෂණ වාර්තා ප්‍රකාශයට පත් කරන සඟරාවක් වන හෙලියොන්හි පළ කර ඇති නව අධ්‍යයනයකින් හෙළි වී තිබේ.
ශ්‍රී ජයවර්ධනපුර විශ්වවිද්‍යාලයේ සත්ව විද්‍යා දෙපාර්තමේන්තුවේ සඳුනි ගමගේ සහ යසන්ත මහගමගේ විසින් සිදු කරන ලද මෙම පර්යේෂණයේ දී සිදුකර ඇත්තේ, මෙරට බහුලව භාවිත වන නිෂ්පාදනවල දක්නට ලැබෙන ක්ෂුද්‍ර ප්ලාස්ටික් හඳුනා ගැනීම ඇතුළු කරුණුයි.
‘ශ්‍රී ලංකාවේ පෞද්ගලික සත්කාර නිෂ්පාදන සහ රූපලාවන්‍ය ද්‍රව්‍යවල ක්ෂුද්‍ර ප්ලාස්ටික්’ යන මාතෘකාව යටතේ සිදු කරන ලද අධ්‍යයනය, ක්ෂුද්‍ර ප්ලාස්ටික්වල පැවැත්ම සහ වර්ගය තීරණය කිරීම සඳහා ස්ක්‍රබ්, ක්‍රීම් සහ පිරිසිදු කරන ද්‍රව්‍ය ඇතුළු බහුලව ලබාගත හැකි පෞද්ගලික සත්කාර නිෂ්පාදන 30ක් විශ්ලේෂණය කර තිබේ.
පරීක්ෂා කරන ලද නිෂ්පාදන 30න් 23ක එනම් සියයට 76.7ක ප්‍රමාණයක ප්ලාස්ටික් ක්ෂුද්‍ර අංශු අඩංගු බව පර්යේෂකයෝ තහවුරු කළහ.
නිෂ්පාදනවලින් ලබාගත් අංශුවල රසායනික සංයුතිය හඳුනා ගැනීම සඳහා කණ්ඩායම ATR FT-IR නමින් හැඳින්වෙන වර්ණාවලීක්ෂය භාවිත කර තිබේ.
මෙය ද්‍රව්‍යමය හා පාරිසරික විශ්ලේෂණයන්හි දී බහුලව භාවිත ක්‍රමයකි.
වර්ණාවලීක්ෂ විද්‍යාත්මකව විශ්ලේෂණය කිරීමට පෙර අංශු මුලින්ම පෙරීම සහ අන්වීක්ෂය හරහා හුදකලා කරන ලදී.
ATR FT-IR ප්‍රතිඵල මගින් තහවුරු කරන ලද්දේ පවතින ප්‍රමුඛ අංශු ක්ෂුද්‍ර ප්ලාස්ටික් ද්‍රව්‍ය වන පොලිඑතිලීන් සහ පොලිප්‍රොපිලීන් බවයි.
පොලිඑතිලීන් අංශු බොහෝ දුරට මුහුණේ ස්ක්‍රබ්වල දක්නට ලැබුණු අතර, පොලිප්‍රොපිලීන් මුහුණේ ආලේප කරන ක්‍රීම් සහ බොඩිවොෂ් කිහිපයකින් අනාවරණ වී තිබේ.
අධ්‍යයනයේ විශේෂයෙන් සැළකිලිමත් වූ අංගයක් වූයේ නව යොවුන් වියේ සහ තරුණ වැඩිහිටියන්ට අලෙවි කරන නිෂ්පාදනවල ක්ෂුද්‍ර ප්ලාස්ටික් පැතිරීමයි.
සමේ පැහැදිලි බව සහ කුරුලෑ වැළැක්වීම ප්‍රවර්ධනය කරන මුහුණ පිරිසිදු කරන ද්‍රව්‍ය සහ ස්ක්‍රබ් මේවාට ඇතුළත් විය.
එවැනි නිෂ්පාදන නිතිපතා භාවිත කිරීම නිදන්ගත සමේ රෝගවලට නිරාවරණයට හේතු විය හැකි බව පර්යේෂණයෙන් පෙනී යයි.
ඒවායේ දිගු කාලීන සෞඛ්‍ය බලපෑම් තවමත් විමර්ශන යටතේ පවතී.
ශ්‍රී ලංකාවේ රූපලාවන්‍ය නිෂ්පාදනවල ක්ෂුද්‍ර ප්ලාස්ටික් ඇතුළත් කිරීම සම්බන්ධයෙන් දේශීය නියාමනයක් නොමැති බව ද අධ්‍යයනයෙන් පෙන්වා දෙයි.
රටවල් කිහිපයක ක්ෂුද්‍ර පබළු තහනම් කිරීමට උත්සාහයන් තිබියදීත්, ශ්‍රී ලංකාවේ දැනට එවැනි නීති සම්පාදන රාමුවක් නොමැත.
