බස්නාහිර පළාතේ රථ වාහන සහ යතුරුපැදි සොරකම් රැසකට සම්බන්ධ සැකකරුවන් සිව්දෙනකු හෙරොයින් සන්තකව සිටියදී පොලිස් මෙහෙයුම් කිහිපයකදී අත්අඩංගුවට ගත් බව පොලිසිය පවසයි.

ලද බුද්ධි තොරතුරු මත ක්‍රියාත්මක වූ මීගොඩ පොලිසියේ කණ්ඩායමක් මීගොඩ ප්‍රදේශයේදී හෙරොයින් ග්‍රෑම් 8.6ක් සහ මෝටර් රථයක් සමඟ සැකකරුවන් දෙදෙනකු අත්අඩංගුවට ගෙන ඇත.

මෙම මෝටර් රථය පසුගිය ජූලි 4 වැනිදා කඩවත පොලිස් වසමෙන් සොරකම් කර ඇති බවට තොරතුරු ලැබී ඇති බව විමර්ශනවලදී අනාවරණයවී තිබේ.

හංවැල්ල ප්‍රදේශයේදී සිදුකළ තවත් පොලිස් මෙහෙයුමකදී හෙරොයින් ග්‍රෑම් 10.45ක් සමඟ සැකකරුවන් දෙදෙනෙකු අත්අඩංගුවට ගෙන තිබේ.

කොල්ලකෑම් සඳහා යොදාගත් බවට සැළකෙන ත්‍රිරෝද රථයක් සහ පිහියක් ද පොලිසිය විසින් එහිදී සොයාගෙන තිබේ.

අත්අඩංගුවට ගත් පුද්ගලයන් අවිස්සාවේල්ල, වැල්ලම්පිටිය, නවගමුව, කිරුළපන ඇතුළු පොලිස් වසම් තුළ යතුරුපැදි දෙකක් සහ ත්‍රිරෝද රථ දෙකක් සොරකම් කිරීමට සම්බන්ධ බවට වැඩිදුර විමර්ශනවලදී අනාවරණය වී ඇතැයි පොලීසිය පවසයි.

සොරකම් කරන ලද යතුරුපැදි දෙකක් දැනටමත් සොයාගෙන ඇති අතර සොරකම් කරන ලද ත්‍රිරෝද රථයක් මීට පෙර පාදුක්ක පොලිසිය භාරයට ගෙන තිබේ.

සැකකරුවන් දැනට විදේශගතව සිටින සංවිධානාත්මක අපරාධකරුවකු යටතේ ක්‍රියාකරන බවට විශ්වාස කරන බව පොලිසිය පවසයි.

සොරකම් කරන ලද වාහන සැකකරුවන් විසින් එම පුද්ගලයාට මුදල් වෙනුවට හුවමාරු කර ඇති බව පැවැසේ.

සැකකරුවන් ජුලි 8 වැනි දින හෝමාගම මහේස්ත්‍රාත් අධිකරණයට ඉදිරිපත් කර ඇති අතර ඔවුන් අවුරුදු 28ත් 39ත් අතර වයස් කාණ්ඩවල පසුවන්නන් බව ද පොලිසිය සඳහන් කරයි.