පාර්ලිමේන්තු මන්ත්‍රී නාමල් රාජපක්ෂගේ පෞද්ගලික ලේකම් සංජය සමරසිංහගේ ගල්කිස්ස පිහිටි නිවස අල්ලස් හෝ දූෂණ චෝදනා විමර්ශන කොමිෂන් සභාව විසින් පරීක්ෂාවට ලක්කර ඇත.

වාර්තා වන ආකාරයට, මෙම සෙවුම් මෙහෙයුම සිදුකර ඇත්තේ දූෂණ චෝදනාවකට අදාළව වන අතර, එහිදී නිවසේ තිබී හමු වූ සේප්පුවක් ද නිලධාරීන් භාරයට ගෙන තිබේ.

මෙම මෙහෙයුම අල්ලස් කොමිසමේ නිලධාරීන්, ශ්‍රී ලංකා පොලිසිය සහ පොලිස් විශේෂ කාර්ය බලකාය එක්ව ඒකාබද්ධ මෙහෙයුමක් ලෙස ක්‍රියාත්මක කර ඇත.

නිලධාරීන් විසින් නිවස සම්පූර්ණයෙන්ම සෝදිසි වරෙන්තුවකට අනුව පරීක්ෂා කර ඇති අතර, මෙහෙයුම අතරතුර කටඋත්තර ද සටහන් කරගෙන ඇති බව වාර්තා වේ.

කෙසේවෙතත්, මෙම සෙවුම් මෙහෙයුමට හේතුව හෝ විමර්ශනයට අදාළ වැඩිදුර තොරතුරු බලධාරීන් විසින් මෙතෙක් නිල වශයෙන් හෙළිකර නොමැත.