2026 දී ශ්‍රී ලංකාවේ ආර්ථික ප්‍රකෘතිය මතුපිටින් පෙනෙන දියුණුවක් පෙන්නුම් කළද, විශේෂයෙන් මෑත කාලීනව රටට බලපෑ ස්වාභාවික විපත්වලින් පසුව, ණය බැඳීම්, බිඳෙන සුළු විදේශ විනිමය ප්‍රවාහ සහ ඉහළ යන මූල්‍ය පීඩන හේතුවෙන් දැඩි ලෙස සීමා වී ඇති බව එක්සත් ජාතික පක්ෂයේ හිටපු නියෝජ්‍ය නායක පාර්ලිමේන්තු මන්ත්‍රී රවී කරුණානායක අනතුරු අඟවා තිබේ.

මුදල් අමාත්‍යාංශයේ නිල මූල්‍ය දත්ත උපුටා දක්වමින් මේ බව පැවසූ මන්ත්‍රීවරයා පෙන්වාදුන්නේ, ජාත්‍යන්තර මූල්‍ය අරමුදල සහාය දක්වන විස්තීර්ණ අරමුදල් පහසුකම යටතේ ලබා ඇති ප්‍රතිලාභ තිබියදීත්, ශ්‍රී ලංකාව තවමත් අනතුරෙන් මිදී නොමැති බවයි.

ලබන වසරේ බාහිර ණය සේවා කළමනාකරණය කිරීමට රජයට ඇති හැකියාව සම්පූර්ණයෙන්ම පාහේ රඳාපවතින්නේ ආදායම් ඉලක්ක දැඩි ලෙස පිළිපැදීම, වියදම් කළමනාකරණය සහ අඛණ්ඩ විදේශ විනිමය ගලා ඒම් මත බව ද ඔහු සඳහන් කළේය.

මුදල් අමාත්‍යාංශයේ දත්තවලට අනුව, 2032 වන විට විදේශ ණය සේවාකරණය දළ දේශීය නිෂ්පාදිතයෙන් 4.5% ට වඩා අඩුවෙන් තබාගැනීමට සහ මුළු රාජ්‍ය ණය දළ දේශීය නිෂ්පාදිතයෙන් 95% ක් පමණ දක්වා අඩුකිරීමට ශ්‍රී ලංකාව ජාත්‍යන්තර මූල්‍ය අරමුදලේ ණය වැඩසටහන යටතේ කැපවී සිටියි.

මෙම මිණුම් සලකුණු මූල්‍ය දෝෂ සඳහා ඉතා සුළු ඉඩක් ඉතිරි කරන බව මන්ත්‍රීවරයා පෙන්වාදුන් අතර, ණය තිරසාරභාවය දැන් දශකයේ අවසානය දක්වා කල්නොදමා වාර්ෂිකව පරීක්ෂාවට ලක්කෙරෙන බව ද ඔහු අවධාරණය කළේය.

එමෙන්ම මන්ත්‍රීවරයා පෙන්වාදුන්නේ මහජන මතයට පටහැනිව, ශ්‍රී ලංකාව දැනටමත් ප්‍රතිව්‍යුහගත කරන ලද ණය සඳහා සේවා සපයන බව සහ 2028 වන තෙක් බලා නොසිටින බවයි.

ණය ප්‍රතිව්‍යුහගත කිරීමේ ගිවිසුම් මගින් 2023 සහ 2027 අතර කාලය තුළ ක්ෂණික ආපසු ගෙවීමේ පීඩනය ඩොලර් බිලියන 17 කින් පමණ අඩු කර ඇති අතර ඔහු එම තත්වය පිළිබඳ පැහැදිළි කළේ සැලකිය යුතු නමුත් තාවකාලික සහනයක් ලෙසය.

සහන කාලයන් අඩු වූ පසු, වර්ධනය සහ ආදායම වැඩිදියුණු නොවන්නේ නම් ණය බරට නැවත මුහුණ දීමට සිදුවනු ඇතැයි ඔහු අනතුරු ඇඟවීය.

එමෙන්ම මන්ත්‍රීවරයා පැවසුවේ ජාත්‍යන්තර මූල්‍ය අරමුදල විසින් නියම කරන ලද මූල්‍ය ඒකාබද්ධතාවය සපුරාලීම සඳහා බදුකරණය රජයේ ප්‍රධාන මෙවලම ලෙස පවතින බවයි.

ආර්ථික වර්ධනයක් සමඟ නොගැලපෙන ආක්‍රමණශීලී බදු ප්‍රසාරණය අනුකූලතාව අඩු කළ හැකි අතර කුඩා හා මධ්‍ය පරිමාණ ව්‍යවසාය සංවර්ධනය අඩාල කළ හැකි බව ද මන්ත්‍රීවරයා අනතුරු ඇඟවීය.