එක්සත් රාජධානියේ කාඩිෆ් වීදියේ දී ශ්‍රී ලාංකික කාන්තාවක් මියගොස් සිටියදී සොයා ගෙන තිබේ.

එම සිදුවීමට අදාළව 37 හැවිරිදි ශ්‍රී ලාංකිකයකුට මිනීමැරුම් චෝදනා එල්ල වී ඇතැයි එරට මාධ්‍ය වාර්තා කරයි.

බරපතළ තුවාල ලැබූ කාන්තාවක් පිළිබඳ වාර්තා වීම නිසා බ්‍රහස්පතින්දා උදෑසන දකුණු වේල්ස් පොලිසිය රිවර්සයිඩ් හි දකුණු මෝගන් පෙදෙසට පැමිණ තිබිණි.

32 හැවිරිදි නිවුන්හැල්ලලාගේ දෝන නිරෝධා ලක්පනි නිවුන්හැල්ල එම ස්ථානයේදීම මියගොස් සිටියදී පොලිසියට හමුවී තිබිණි.

සිද්ධිය සම්බන්ධයෙන් පෙන්ට්වින් හි තිසර වේරගලගේ, ටික වේලාවකට පසු අත්අඩංගුවට ගත් අතර පසුව ඔහුට මිනීමැරුම් චෝදනා එල්ල විය.

නිරෝධා ලෙස ප්‍රකට නිවුන්හැල්ලලාගේ දෝන නිරෝධා කල්පනී නිවුන්හැල්ලගේ පවුලේ අය ඇයට උපහාර දක්වමින් සටහන් කර තිබුණේ “අපි නිරෝධාව ආදරණීය දියණියක්, පවුලේ සාමාජිකාවක් සහ බොහෝ දෙනෙකුගේ ආදරණීය මිතුරියක් ලෙස සිහිපත් කරමු. නිරෝධාව සාමයෙන්, ආදරයෙන් සහ කෘතඥතාවයෙන් සදහටම සිහිපත් කරනු ඇත. ඇය ඇගේ කරුණාවෙන් බොහෝ ජීවිත ස්පර්ශ කළ අතර ඇගේ මතකය අපට ආශ්වාදයක් ලබා දෙනු ඇත. ඇගේ ජීවිතය ඉතා ඉක්මනින් අවසන් වුවද, ඇය බෙදාගත් ආදරය සැමවිටම අප සමඟ පවතිනු ඇත” යනුවෙනි.

“නිරෝධාගේ පවුලේ අය, මිතුරන් සහ ආදරණීයයන්ට මෙම ඛේදජනක සිදුවීම ගැන මගේ හෘදයාංගම ශෝකය ප්‍රකාශ කරමි. මේ අවස්ථාවේ දී ඇගේ ආදරණීයයන්ට සහාය වීමට විශේෂයෙන් පුහුණු නිලධාරීන් සිටින අතර ඔවුන්ගේ පෞද්ගලිකත්වයට ගරු කරන ලෙස ඉල්ලා සිටිමු. තවමත් නිලධාරීන් සමඟ කතා කර නොමැති තොරතුරු ඇති ඕනෑම අයකුට ඉදිරියට පැමිණ අපගේ විමර්ශනයට සහාය වන ලෙස මම ඉල්ලා සිටිමි.” යනුවෙන් ජ්‍යෙෂ්ඨ විමර්ශන නිලධාරි මැතිව් ඩේවිස් පැවසීය.

රහස් පරීක්ෂකයන් ඉල්ලා සිටියේ සාක්ෂිකරුවන් හෝ අසල සීසීටීවී/ඩෑෂ් කැමරා දර්ශන ඇති ඕනෑම අයකු ඉදිරිපත් වන ලෙසයි.

වෙලින්ටන් වීදිය, ක්ලෙයාර් පාර, පෙනාර්ත් පාර සහ නැගෙනහිර ටින්ඩෝල් වීදිය ඇතුළු දකුණු මෝගන් පෙදෙසේ හෝ ඒ අසල සීවෝල් පාරේ පෙ.ව. 7.30 සිට පෙ.ව. 8.30 දක්වා අළු පැහැති ෆෝඩ් ෆියෙස්ටා රථයක් පිළිබඳ තොරතුරු ඇති ඕනෑම අයකුගෙන් ඔවුන් තොරතුරු බලාපොරොත්තුවෙන් සිටී.