ශ්‍රී ලංකාව රාජ්‍ය ණය කළමනාකරණ කාර්යාලයක් (PDMO) පිහිටුවන අතර එය 2026 ජනවාරි වන විට සම්පූර්ණයෙන්ම ක්‍රියාත්මක වීමට අපේක්ෂා කරන බව මුදල් අමාත්‍යාංශය පවසයි.

නිවේදනයක් නිකුත් කරමින් අමාත්‍යාංශය පවසන්නේ, නොවැම්බර් 25 දින සිට බලාත්මක වූ 2024 අංක 33 දරන රාජ්‍ය ණය කළමනාකරණ පනත බලාත්මක කිරීමෙන් අනතුරුව රාජ්‍ය ණය කළමනාකරණ කාර්යාලය 2024 දෙසැම්බර් 2 දින සිට මෙහෙයුම් ආරම්භ කළ බවයි.

ස්වාධීනව කිරියාත්මක වන මෙම කාර්යාලය රාජ්‍ය ණය කළමනාකරණය මධ්‍යගත කිරීම සහ වැඩිදියුණු කිරීම, වගවීම වැඩිදියුණු කිරීම සහ ණය ගැනීමේ පිළිවෙත්වල විනිවිදභාවය ප්‍රවර්ධනය කිරීම අරමුණු කරයි.

රාජ්‍ය ණය කළමනාකරණ කාර්යාලය විසින් රජයේ ණය, ණය ඇපකර, ණය දීමේ මෙහෙයුම් සහ රාජ්‍ය ණය වාර්තා කිරීම අධීක්ෂණය කරනු ඇත.

එහි ප්‍රධාන වගකීම් අතරට මධ්‍ය කාලීන ණය කළමනාකරණ උපාය මාර්ගයක් සකස් කිරීම, දේශීය හා බාහිර ණය ගැනීම් සම්බන්ධීකරණය කිරීම සහ කාලීන ණය සේවා සහතික කිරීම ඇතුළත් වේ.

මහ බැංකුව, විදේශ සම්පත් දෙපාර්තමේන්තුව සහ භාණ්ඩාගාර මෙහෙයුම් දෙපාර්තමේන්තු වෙතින් අදාළ කාර්යයන් පවරා ගනිමින්, කාර්යාලය 2026 ජනවාරි වන විට සම්පූර්ණයෙන්ම ක්‍රියාත්මක වීමට අපේක්ෂා කෙරේ.

කැබිනට් මණ්ඩලය විසින් පත්කරන ලද අධ්‍යක්ෂ ජනරාල්වරයා කාර්යාලය මෙහෙයවා මුදල් අමාත්‍යවරයා වෙත වාර්තා කරනු ඇත.

රජය සතු ව්‍යවසායන් සහ අනෙකුත් ආයතන දැන් නව නීතියේ විධිවිධානවලට අනුකූලව රාජ්‍ය ණය කළමනාකරණ කාර්යාලය සමඟ ණය ගැනීමේ සැලසුම් සම්බන්ධීකරණය කළ යුතුය.