මේ වසරේ මාර්තු මාසයේ පැවැත්වීමට නියමිත එක්සත් ජාතීන්ගේ මානව හිමිකම් කවුන්සිලයේ ශ්‍රී ලංකාව සම්බන්ධ ක්‍රියාවලියට එරෙහිව අප්‍රිකාව ඇතුළු විවිධ රටවල නායකයන් සම්බන්ධ කර ගනිමින් ශ්‍රී ලංකාව නව ප්‍රවේශයක් ලබාගැනීමට නියමිත බව වාර්තා වේ.

මේ වන විට ස්විට්සර්ලන්තයේ ඩාවෝස් (Davos) නුවරට ගොස් සිටින ජනාධිපති රනිල් වික්‍රමසිංහ පසුගිය සඳුදා ආරම්භ වූ නොබැඳි ජාතීන්ගේ සමුළුවට (Non-Aligned Summit) සහභාගි වීම සඳහා උගන්ඩාව බලා පිටත්ව යෑමට නියමිතය.

නොබැඳි ජාතීන්ගේ19 වැනි සමුළුව සඳහා ලොව පුරා රටවල් 120ක පමණ නායකයින් උගන්ඩාවේ කම්පාලා (Kampala) අගනුවරට රැස්වී ඇති බව වාර්තා වේ.

සමුළුවට සමගාමීව එක්සත් ජාතීන්ගේ මානව හිමිකම් කවුන්සිලයේ සහයෝගීතාව ඇතුළු ද්විපාර්ශ්වික සබඳතා ශක්තිමත් කිරීම සඳහා ජනාධිපතිවරයා අප්‍රිකානු රටවල් ගණනාවක නායකයන් සමඟ ද්විපාර්ශ්වික සාකච්ඡා පැවැත්වීමට නියමිතව තිබේ.

සිවිල් යුද්ධය අවසන් වීමෙන් පසු 2012 සිට ශ්‍රී ලංකාව එක්සත් ජාතීන්ගේ මානව හිමිකම් කවුන්සිලයේ අවධානයට ලක්ව ඇති අතර, ශ්‍රී ලංකාව සම්බන්ධ ක්‍රියාවලිය ඉදිරි සැසියේදී නැවත වරක් විභාගයට ගැනීමට නියමිත බව වාර්තා වේ.

එක්සත් ජාතීන්ගේ මානව හිමිකම් කවුන්සිලයේ නවතම යෝජනාවලින් අපේක්ෂා කරන ක්‍රියාමාර්ග ක්‍රියාත්මක කිරීමට රජය පියවර ගෙන තිබේ.

එසේම, යුද්ධයෙන් පසු දෙමළ ප්‍රජාව සමඟ සංහිඳියාව ඇති කිරීමේ ප්‍රධාන පියවරක් ලෙස, ‘ජාතික සමගිය හා ප්‍රතිසන්ධාන කාර්යාලයක්’ පිහිටුවීම සඳහා රජය පසුගියදා පනත් කෙටුම්පතක්ද සම්මත කරන ලදී.