එමිරේට්ස් විසින් නිකුත් කරන ලද නව දත්ත වලට අනුව මෙම ගිම්හානයේදී එක්සත් අරාබි එමීර් රාජ්‍යයේ පදිංචිකරුවන්ට සංචාරය කිරීමට හොඳම ගමනාන්ත අතර ශ්‍රී ලංකාව ද ඇතුළත් කර තිබේ.

Khaleej Times වාර්තා කරන පරිදි, එක්සත් අරාබි එමීරයේ වැසියෝ මෙම ගිම්හානයේදී ශ්‍රී ලංකාව, ජෝර්දානය, මොරොක්කෝව, ප්‍රංශය, ඉන්දියාව සහ ලෙබනනය වෙත ගුවන් ගමන් සංචාර සැලසුම් කරමින් සිටිති.

වෙරළ නිවාඩු, සංස්කෘතික ස්ථාන සහ මූල්‍ය ගෙවීම් සඳහා සරිලන සුඛෝපභෝගීත්වය කෙරෙහි ඇති උනන්දුව හේතුවෙන් ශ්‍රී ලංකාවේ සංචාරය කිරීමට පවතින අවස්ථා සියයට 32ක වැඩිවීමක් පෙන්නුම් කර තිබේ.

ඒ අනුව එමිරේට්ස් ගුවන් සමාගම කොළඹ වෙත දිනපතා නව ගුවන් ගමන් කිහිපයක් ලබාදෙන බව වාර්තාවේ සඳහන් වේ.

එක්සත් අරාබි එමීර් රාජ්‍යයේ පියාසැරි සෙවීම් පසුගිය වසරට සාපේක්ෂව සියයට 13 කින් ඉහළ ගොස් ඇති බව එමිරේට්ස් දත්ත තවදුරටත් වාර්තා කර ඇති අතර, එය එම සේවාව සඳහා පවතින ඉල්ලුම ඉහළයෑම පෙන්නුම් කරයි.

එමිරේට්ස් පවසන්නේ, ගිම්හාන සමයේ සංචාර සඳහා වන සමස්ත සෙවුම්, සිය ජාලය හරහා සියයට 7 කින් ඉහළ ගොස් ඇති බවයි.

ආසියාවේ, ඉන්දියන් සාගරයේ සහ යුරෝපයේ ඇතැම් ප්‍රදේශවල ගමනාන්තයන් වඩාත් ආකර්ෂණය වෙමින් පවතින බව ද එම සමාගම පවසයි.

වියට්නාමය එමිරේට්ස් ජාලයේ වේගයෙන්ම වර්ධනය වන ගමනාන්තය බවට පත්කරමින් එහි සංචාරක ගමනාන්ත පිරික්සීමේ උනන්දුවෙහි සියයට 61 ක වැඩිවීමක් වාර්තා කර තිබේ.

එමිරේට්ස් ගුවන් සමාගම වියට්නාමයේ Ho Chi Minh City, Hanoi සහ Da Nang (Bangkok හරහා) නගර වෙත සතිපතා ගුවන් ගමන් 25ක් ක්‍රියාත්මක කරයි.