October 22, 2025
ආයුර්වේද සම්බාහන ප්‍රතිකාර මධ්‍යස්ථාන නීතිගත කිරීම සහ නියාමනය කිරීම සඳහා පනත් කෙටුම්පතක් සකස් කිරීමට වහාම පියවර ගන්නා ලෙස නීතිපතිවරයාට නියෝග කරන ලෙස ඉල්ලා ශ්‍රී ලංකා ස්පා හිමියන්ගේ සංගමය අභියාචනාධිකරණයට රිට් පෙත්සමක් ගොනුකර ඇත.
පෙත්සමේ වගඋත්තරකරුවන් ලෙස පොලිස්පතිවරයා, මහජන ආරක්ෂක අමාත්‍යාංශයේ ලේකම්, සෞඛ්‍ය අමාත්‍යාංශයේ ලේකම් සහ ආයුර්වේද කොමසාරිස් ජෙනරාල් නම්කර ඇත.
පෙත්සම්කරුවන් පවසන්නේ, සිය සංගමය බලපත්‍රලාභී ආයුර්වේද සම්බාහන ආයතන (ස්පා) වලින් සමන්විත වන අතර, සෑම මධ්‍යස්ථානයක්ම සුදුසුකම් ලත් ආයුර්වේද වෛද්‍යවරයෙකුගේ සහ පුහුණු චිකිත්සකයින්ගේ අධීක්ෂණය යටතේ ක්‍රියාත්මකවන බවයි.
එවැනි සම්බාහන මධ්‍යස්ථාන පවත්වාගෙන යෑම සඳහා බලපත්‍ර නිකුත් කිරීම 2019 සිට අත්හිටුවා ඇති බවත්, එහි ප්‍රතිඵලයක් ලෙස එම ආයතනවලට බාධාවකින් තොරව තම මෙහෙයුම් කරගෙන යෑමට අපහසු වී ඇති බවත් පෙත්සමෙහි තවදුරටත් සඳහන් වේ.
අත්හිටුවීම හේතුවෙන්, පොලිසිය වරින් වර ඔවුන්ගේ මධ්‍යස්ථාන වැටළීම් කර, ඒවාට බාධාකරමින් ඔවුන්ගේ වෘත්තියේ නිදහසේ නිරතවීම වළක්වන බවත් පෙත්සමේ සඳහන් වේ.
ආයුර්වේද සම්බාහන ආයතන නියාමනය කිරීම සඳහා රජය පනත් කෙටුම්පතක් කෙටුම්පත් කිරීමේ ක්‍රියාවලියක යෙදීසිටින බවට තමන්ට තොරතුරු ලැබී ඇති බව පෙත්සම්කරුවන් තවදුරටත් පවසයි.
ඒ අනුව, අදාළ පනත් කෙටුම්පත සකස් කිරීම කඩිනම් කර පාර්ලිමේන්තුවට ඉදිරිපත් කරන ලෙස නීතිපතිවරයාට නියෝග කරමින් නියෝගයක් නිකුත් කරන ලෙස ඔවුන් අභියාචනාධිකරණයෙන් ඉල්ලා තිබේ.
