August 30, 2025
කෙන්යාවේදී ස්පාඤ්ඤ ජාතිකයකු ඇතෙකුගේ හොඬවැලට බියර් වත් කරන වීඩියෝ පළ කිරීමෙන් පසු ඒ පිළිබඳ පරීක්ෂණ ආරම්භ වී තිබේ.
ඔහුගේ ක්‍රියාව සමාජ මාධ්‍ය ඔස්සේ දෝෂදර්ශනයට ද ලක්ව තිබිණි.
වනජීවී රක්ෂිතයක ජනප්‍රිය දේශීය බියර් වර්ගයක් වන ටස්කර් කෑන් එකක් පානය කරන ආකාරයත් ඉතිරි කොටස අලියාට දෙන ආකාරයත් ඔහු රූගත කර ඇත.
‘එක ඇතෙක් දළ ඇතකු සමඟ’ යනුවෙන් ඔහු ඉන්ස්ටග්‍රෑම් හි පළ කරන ලද වීඩියෝවේ ශීර්ෂ පාඨය ලෙස දක්වා තිබිණි.
පසුව කෙන්යානුවන්ගෙන් ඊට ලැබුණු ප්‍රතිචාරයකින් පසු ඔහු එය සිය ගිණුමෙන් මකා දමන ලදී.
බීබීසී දර්ශන විශ්ලේෂණය කර එය අව්‍යාජ බව සත්‍යාපනය කිරීමට සමත් වී තිබිණි.
භූ දර්ශනය අනුව එය ලයිකිපියා මධ්‍යම ප්‍රාන්තයේ ඕල් ජෝගි සංරක්ෂණාගාරයේ රූගත කර ඇති බව පෙන්වා දෙයි.
පෞද්ගලික අයිතියක් යටතේ ඇති එම වනජීවී අභයභූමියේ කාර්ය මණ්ඩල සාමාජිකයකු හැසිරීමෙන් කම්පනයට පත්ව වීඩියෝව අදාළ බලධාරීන් වෙත ලබා දෙන බව පැවසීය.
“අපි අලි ඇතුන් අසලටවත් මිනිසුන්ට යන්න දෙන්නේ නැහැ.”යනුවෙන් ද ඔහු පැවසීය.
කෙන්යාවේ වනජීවී සේවය (KWS) ද සිද්ධිය විමර්ශනය කරමින් සිටි බව එහි ප්‍රකාශක පෝල් උඩෝටෝ බීබීසීයට පවසා තිබේ.
බියර් වීඩියෝවේ දැක්වෙන පුද්ගලයා සඳුදා ද වීඩියෝවක් පළ කර ඇති අතර එහි ඔහු ඕල් පෙජෙටා සංරක්ෂණාගාරයේදී රයිනෝවකුට කැරට් කවන ආකාරය දක්නට ලැබේ.
“රයිනෝ සුරතල් සතෙක් නොවන නිසා ඔහු සතාව ස්පර්ශ නොකළ යුතුයි. ඔහු අපගේ නීති කඩ කරලා,” ඕල් පෙජෙටා හි තිගේ න්ජුගුනා බීබීසීයට පවසා තිබිණි.
කෙන්යානු ජීව විද්‍යාඥයකු සහ අලි සංරක්ෂණඥයකු වන ආචාර්ය විනී කිරු, සංචාරකයාගේ හැසිරීම අවාසනාවන්ත ලෙස හැඳින්වූයේ එමගින් ඔහුගේ සහ අලියාගේ ජීවිතයට අනතුරක් ඇති බැවිනි.
“කෙන්යාවේ අලි ඇතුන්ගෙන් 95%ක් පමණ වන සතුන්. ඔබට අලි ඇතුන්ට සමීප වී ඔවුන්ට පෝෂණය කළ හැකි බවට හැඟීමක් ඇති කරන සමාජ මාධ්‍ය සටහන් තිබීම වැරදියි,” යනුවෙන් ඇය බීබීසීයට පැවසුවාය.
