රත්නපුර මහා සමන් දේවාලයේ පෙරහැර සහ මහනුවර ඇසළ පෙරහැර එකම දිනක පැවැත්වීම හේතුවෙන් පෙරහර දෙකටම අලි ඇතුන් සහභාගි කරවා ගැනීම ගැටලුවක් වී ඇති බව ශ්‍රී දළදා මාලිගාවේ දියවඩන නිලමේ ප්‍රදීප් නිලංග දෑල පවසයි.

මෙවර මහනුවර ඇසළ පෙරහැර සඳහා අවම වශයෙන් අලි ඇතුන් 60 දෙනකුට සහභාගි විය හැකි බව ඔහු ඩේලි මිරර් වෙත පවසා ඇත.

මීට පෙර පැවැති මහනුවර ඇසළ පෙරහැර වාරවලදී අලි ඇතුන් 75 දෙනකු සහභාගී වූ බවද ඔහු සඳහන් කර තිබේ.

“රටේ හීලෑ අලි ඇතුන් 96 දෙනෙක් සිටියා. නමුත් ඔවුන්ගේ ශාරීරික සෞඛ්‍ය තත්ත්වයන් සහ වෙනත් ගැටළු හේතුවෙන් මෙවර පෙරහැර සඳහා රැගෙන යා හැක්කේ අලි ඇතුන් 80 දෙනෙකු පමණයි. රත්නපුර මහා සමන් දේවාලයේ පෙරහැර සඳහා අවම වශයෙන් අලි ඇතුන් 20 ක් යවනු ලැබේ. ඉතිරි අලි ඇතුන් මහනුවර ඇසළ පෙරහැරට යොදවනවා.” යැයි දියවඩන නිලමේවරයා පවසයි.

2000 වසරේදී මෙරට හීලෑ කළ අලි ඇතුන් 225ක් සිටි නමුත් මේ වන විට එම අලි සංඛ්‍යාව 96 දක්වා අඩු වී ඇතැයි ඔහු වැඩිදුරටත් පෙන්වාදී ඇත.