July 29, 2025
රජයේ අධ්‍යාපන ප්‍රතිසංස්කරණ පිළිබඳ මහජන විවාදයක් පැවැත්වෙමින් තිබෙන පසුබිමක මීට පෙර අධ්‍යාපන ප්‍රතිසංස්කරණ සම්පාදනය කිරීමට සම්බන්ධ වූ විශේෂඥයන්ගේ සහාය ලබා ගැනීමට අධ්‍යාපනය පිළිබඳ ආංශික අධීක්ෂණ කමිටුව තීරණය කර තිබේ.
යෝජිත අධ්‍යාපන ප්‍රතිසංස්කරණ පුළුල් ලෙස පරීක්ෂා කිරීමට අතීතයේ දී අධ්‍යාපන ක්ෂේත්‍රය ප්‍රතිසංස්කරණය කිරීමට සම්බන්ධ වී ඇති අදාළ අංශවල විශේෂඥයන්ගෙන් උපදෙස් ලබා ගැනීමට අපේක්ෂා කරන බව කමිටු සභාපති පාර්ලිමේන්තු මන්ත්‍රී හේෂා විතානගේ කමිටු රැස්වීමට පැවසීය.
නිසි අධ්‍යාපන ප්‍රතිසංස්කරණ ක්‍රියාත්මක කිරීම සහතික කිරීම සඳහා කමිටුවේ පූර්ණ සහයෝගය ලබා දෙන බව ඔහු පැවසීය.
අධ්‍යාපන ක්ෂේත්‍රයේ ප්‍රතිසංස්කරණ ක්‍රියාත්මක කිරීමේදී ව්‍යුහගත විෂය නිර්දේශවල අවශ්‍යතාව අධීක්ෂණ කමිටුවේ සාමාජිකයෝ අවධාරණය කළහ.
අධ්‍යාපන, උසස් අධ්‍යාපන සහ වෘත්තීය පුහුණු අමාත්‍යාංශයේ ලේකම් නාලක කළුවැව, ජාතික අධ්‍යාපන කොමිසමේ නියෝජිතයන්, ජාතික අධ්‍යාපන ආයතනයේ අධ්‍යක්ෂ ජනරාල්වරයා සහ අධ්‍යාපන අමාත්‍යාංශයේ තවත් ජ්‍යෙෂ්ඨ නිලධාරීන් කිහිප දෙනෙකු මෙම රැස්වීමට සහභාගී වූහ.
යෝජිත අධ්‍යාපන ප්‍රතිසංස්කරණ පිළිබඳ අමාත්‍යාංශ නිලධාරීහු කමිටුවට පැහැදිලි කළහ.
මේ අතර, සමෘද්ධි (සංශෝධන) පනත් කෙටුම්පත කෙරෙහි ද ආංශික අධීක්ෂණ කමිටුවේ අවධානය යොමු විය.
සමෘද්ධි බැංකුවේ ක්‍රියාකාරිත්වය පිළිබඳ කමිටුව විමසා සිටි අතර, එම පනත් කෙටුම්පත දෙවැනි වර කියවීම සඳහා පාර්ලිමේන්තුවට ඉදිරිපත් කිරීමට අදාළ අනුමැතිය ලබා දෙන ලදී.
පාර්ලිමේන්තු මන්ත්‍රීවරුන් වන සුනිල් රාජපක්ෂ, චානක මඩුගොඩ, තුරෙයිරාසා රවිකරන්, නීතිඥ නිලූෂා ලක්මාලි ගමගේ සහ ක්‍රිෂ්ණන් කලෙයිචෙල්වි යන මහත්ම මහත්මීහු ද රැස්වීමට සහභාගී වූහ.
