දෙහිවල ප්‍රදේශයේ සිදු වූ වෙඩි තැබීමකින් එක් අයකු මිය ගොස් තවත් අයකුට තුවාල සිදුකිරීම සම්බන්ධයෙන් විදේශ රටක නිෂ්පාදිත රිවෝල්වරයක් සමග සැකකරුවකු අත්අඩංගුවට ගත් බව පොලිසිය පවසයි.

දෙහිවල පදිංචි 35 හැවිරිදි සැකකරු බස්නාහිර පළාත් දකුණු අපරාධ කොට්ඨාසයේ නිලධාරීන් විසින් කොට්ටාව පොලිස් බල ප්‍රදේශයේදී ඊයේ (23) අත්අඩංගුවට ගත් බව පොලිසිය නිවේදනයක් නිකුත් කරමින් කියා සිටියේය.

දෙසැම්බර් 6 වැනිදා දෙහිවල, වේරතැන්න පාරේ සිදු වූ වෙඩි තැබීමට සම්බන්ධ දෙවැනි තුවක්කුකරු මෙම සැකකරු බව විමර්ශකයන් සඳහන් කර ඇත.

දේශීයව නිෂ්පාදනය කරන ලද ගිනි අවියක් භාවිත කළ බව කියන අනෙක් සැකකරු මීට පෙර අත්අඩංගුවට ගෙන රක්ෂිත බන්ධනාගාර ගතකර සිටී.

මෙම සැකකරු 2013 දී හමුදාවෙන් ඉවත්වූ හිටපු සොල්දාදුවකු බව පසුව කළ ප්‍රශ්න කිරීම් මගින් සොයා ගත් බව පොලිසිය පැවසීය.

අපරාධය සඳහා භාවිත කළ රිවෝල්වරය දෙහිවල පොලිස් බල ප්‍රදේශයේ පාළු නිවසකින් සොයා ගන්නා ලදී.

වැඩිදුර පරීක්ෂණවලින් හෙළි වී ඇත්තේ සැකකරු දෙසැම්බර් 30 වැනිදා කොහුවල පොලිස් බල ප්‍රදේශයේ සිදු වූ තවත් වෙඩි තැබීමේ සිද්ධියකට ද සම්බන්ධ බවයි.

එහිදී 16 හැවිරිදි දැරියක් තුවාල ලැබූ බව පොලිසිය පැවසීය.

බලධාරීන් පැවසුවේ අපරාධ දෙකම දැනට විදේශගතව සිටින බවට විශ්වාස කෙරෙන සංවිධානාත්මක අපරාධ සහ මත්ද්‍රව්‍ය ජාලයේ ප්‍රධානියෙකුගේ මඟ පෙන්වීම යටතේ සිදු කර ඇති බවයි.

සැකකරු අද (24 ) ගල්කිස්ස මහේස්ත්‍රාත්වරයා හමුවට ඉදිරිපත් කිරීමට නියමිතය.