ආර්ථික ප්‍රශ්න සම්බන්ධයෙන් දෙපාර්ශ්වයේ ප්‍රතිපත්ති පිළිබඳ ජාතික ජන බලවේගය නායක අනුර කුමාර දිසානායක සමඟ යෝජිත විවාදය මැයි මාසයේදී පැවැත්වීමට සජිත් ප්‍රේමදාස මහතා සූදානම් බව සමගි ජන බලවේගය ඊයේ දැනුම්දී තිබේ.

එහෙත් ඔවුන් දැනුම්දී ඇත්තේ නලින්ද ජයතිස්ස විසින් යෝජනා කරන දිනවලදී එම විවාදයට සහභාගී වීමට නොහැකිවන බවයි.

මැයි 7, 9, 13 හෝ 14 යන දිනයන්හිදී ජාතික ජන බලවේගයේ නායකයා විවාදයට සූදානම් බව වෛද්‍ය ජයතිස්ස යෝජනා කර තිබිණි.

කෙසේවෙතත් කාන්තා සමුළුවක් සහ ගොවි සමුළුවක් ඇතුළු සම්මන්ත්‍රණ කිහිපයක් පැවැත්වීමට සැලසුම් කර ඇති බැවින් ප්‍රේමදාස මන්ත්‍රීවරයාට එම දිනවල එය කළ නොහැකි බව නිවේදනයක් නිකුත් කරමින් සමගි ජන බලවේගය දැනුම් දී ඇත.

සජිත් ප්‍රේමදාස ප්‍රසිද්ධ රැස්වීමකදී ද ප්‍රකාශ කළේ මැයි මාසයේදී ජාතික ජන බලවේගයේ නායකයා සමඟ විවාදයක් කිරීමට තමන් කැමති නමුත් වෛද්‍ය ජයතිස්ස විසින් යෝජනා කරන දිනවලදී එය සිදුකළ නොහැකි බවයි.

“අපිට වාද විවාද දෙකක් අවශ්‍යයි, එකක් පක්ෂ දෙකේ නායකයන් අතර සහ අනෙක දෙපක්ෂයේම ආර්ථික විශේෂඥ කණ්ඩායම් අතර,” යනුවෙන් ඔහු ප්‍රකාශ කර තිබිණි.