July 4, 2025
තලේබාන් සංවිධානය 2021 දී බලය අල්ලා ගැනීමෙන් පසු පිහිටවූ ඇෆ්ගනිස්ථානයේ ‘තලේබාන් රජය’ නිල වශයෙන් පිළිගත් පළමු රට බවට රුසියාව පත්ව තිබේ.
ඒ අනුව රුසියාව එරට නීතිවිරෝධී සංවිධාන ලැයිස්තුවෙන් ද තලේබාන් සංවිධානය ඉවත්කර ඇත.
රුසියානු විදේශ අමාත්‍යාංශය නිවේදනය කළේ, ඇෆ්ගනිස්ථානයේ අලුතින් පත්කරන ලද තානාපති ගුල් හසන් හසන්ගෙන් අක්තපත්‍ර ලැබී ඇති බවයි.
ඇෆ්ගන් රජයේ නිල පිළිගැනීම ඵලදායී ද්විපාර්ශ්වික සහයෝගීතාව පෝෂණය කරනු ඇති බව අමාත්‍යාංශය නිවේදනයක් නිකුත් කරමින් සඳහන් කර තිබේ.
ඇෆ්ගනිස්ථානයේ විදේශ අමාත්‍යාංශය මෙම රුසියානු සබඳතාව ඓතිහාසික පියවරක් ලෙස හැඳින්වූ අතර, තලේබාන් විදේශ අමාත්‍ය අමීර් ඛාන් මුටාකි පවසා ඇත්තේ, රුසියාව අනෙකුත් රටවලට හොඳ ආදර්ශයක් බවයි.
2021 අගෝස්තු මාසයේදී එක්සත් ජනපද සහ නේටෝ හමුදා ඉවත්කර ගැනීමෙන් පසු තලේබාන්වරු ඇෆ්ගනිස්ථානයේ පාලනය අත්පත් කරගත්හ.
එතැන් සිට, ඔවුන් ඉස්ලාමීය නීතිය රට තුළ දැඩුව ක්‍රියාත්මක කරන අතරම, රාජ්‍යතාන්ත්‍රික සබඳතා සඳහා එක්වන්නැයි අන්තර්ජාතික ප්‍රජාවට ආරාධනා කර තිබේ.
එහෙත් මෙතෙක් කිසිඳු රටක් තලේබාන් පරිපාලනය නිල වශයෙන් පිළිගෙන නොතිබුණද, ඔවුන් බොහෝ රටවල් සමඟ ඉහළ මට්ටමේ සාකච්ඡාවල නිරත වී තිබේ.
ඒ අතර චීනය සහ එක්සත් අරාබි එමීර් රාජ්‍යය ඇතුළු රටවල් සමඟ යම් රාජ්‍යතාන්ත්‍රික සබඳතා ගොඩනඟා ගෙන ඇත.
