ලෝක ප්‍රසිද්ධ ‘වික්ටෝරියාස් සීක්‍රට්’ සන්නාමය අනුකරණය කරමින් ව්‍යාජ ලේබල් සහිත ආනයනික ව්‍යාජ සුවඳ විලවුන් ළඟ තබා ගැනීම, විකිණීම සහ බෙදා හැරීම සම්බන්ධයෙන් කොළඹ අතිරේක මහේස්ත්‍රාත් ලහිරු සිල්වා කොළඹ, පිටකොටුවේ ව්‍යාපාරිකයන් තිදෙනෙකුට රුපියල් 600,000ක දඩයක් නියම කර තිබේ.

‘වික්ටෝරියාස් සීක්‍රට්’ ව්‍යාජ සුවඳ විලවුන් ආනයනය කිරීම, ගබඩා කිරීම, විකිණීම සහ බෙදා හැරීම මගින් බුද්ධිමය දේපළ පනත උල්ලංඝනය කිරීම සහ රාජ්‍යයට ලැබිය යුතු බදු ආදායම අහිමි කිරීම යන චෝදනාවලට සැකකරුවන් මූලික අදියරේදී වරද පිළිගත් පසු මෙම දඩය නියම කරන ලදී.

නඩුවට අදාළව අත්අඩංගුවට ගත් සියලුම ව්‍යාජ භාණ්ඩ විනාශ කරන ලෙස අතිරේක මහේස්ත්‍රාත්වරයා තවදුරටත් නියෝග කළේය.

කොළඹ පිටකොටුවේ පිහිටි ව්‍යාපාරික ආයතන තුනක නියෝජිතයන්ට මෙලෙස දඩ නියම කර තිබිණි.

සුදත් පෙරේරා ඇසෝසියේට්ස් හි උපදෙස් මත පැමිණිලිකරු වෙනුවෙන් පෙනී සිටි නීතිඥ දේශාන් හේවාවිතාරණ අධිකරණයට දන්වා සිටියේ වික්ටෝරියාස් සීක්‍රට් සන්නාමය අනුකරණය කරන ව්‍යාජ නිෂ්පාදන ලොව පුරා රටවල් කිහිපයක වංචනික ලෙස නිෂ්පාදනය කර බෙදාහරින බවයි.

ශ්‍රී ලංකාවේ පාරිභෝගිකයන් නොමඟ යවන ව්‍යාජ සුවඳ විලවුන් අලෙවි කිරීම සම්බන්ධයෙන් ලැබුණු පැමිණිලි මත පදනම්ව, එක්සත් ජනපදයේ වික්ටෝරියාස් සීක්‍රට් බ්‍රෑන්ඩ් මැනේජ්මන්ට් සමාගම විසින් පැමිණිල්ලක් ගොනුකර ඇති බවත්, පසුව අධිකරණයෙන් ලබාගත් සෝදිසි වරෙන්තුවක් යටතේ අදාළ භාණ්ඩ අත්අඩංගුවට ගත් බවත් ඔහු තවදුරටත් සඳහන් කළේය.

ආනයනික ව්‍යාජ භාණ්ඩ අවතක්සේරු කිරීමෙන් සහ නියමිත බදු පැහැර හැරීමෙන් සැකකරුවන් රාජ්‍යයට මූල්‍යමය පාඩුවක් සිදුකර ඇති බවත්, පාරිභෝගික සෞඛ්‍යයට හානිකර නිෂ්පාදන අලෙවි කිරීමෙන් නීති විරෝධී ලෙස ලාභ උපයා ඇති බවත් නීතිඥවරයා ප්‍රකාශ කළේය.

එවැනි ප්‍රමිතියෙන් තොර නිෂ්පාදන පාරිභෝගිකයන්ගේ සමට හානි කළ හැකි බවට ඔහු අනතුරු ඇඟවීය.

සැකකරුවන් සන්තකයේ තිබී ව්‍යාජ සුවඳ විලවුන් බෝතල් 400කට අධික ප්‍රමාණයක් අත්අඩංගුවට ගෙන පොලිසිය විසින් අධිකරණයට ඉදිරිපත් කළ බව නඩුවේ දී තවදුරටත් අනාවරණ විය.

බුද්ධිමය දේපළ පනතේ 184 සහ 186 වගන්ති යටතේ, වෙළඳ ලකුණු අනුකරණය කිරීම සහ ව්‍යාජ භාණ්ඩ නිෂ්පාදනය, සන්තකයේ තබා ගැනීම සහ විකිණීම වරදවල් බවත්, එක් එක් සැකකරුට රු. 500,000ට නොඅඩු දඩ මුදල් අය කරන ලෙසත් නීතිඥ හේවාවිතාරණ අධිකරණයෙන් ඉල්ලා සිටියේය.

නුගේගොඩ සහ දෙහිවල ප්‍රදේශවල වෙළඳසැල් කිහිපයකින් මෙවැනිම ව්‍යාජ භාණ්ඩ අත්අඩංගුවට ගෙන ඇති බව ඔහු තවදුරටත් අධිකරණයට දැනුම් දුන්නේය.

සැකකාර ආයතනවල නියෝජිතයෝ අධිකරණය හමුවේ පෙනී සිටි අතර මූලික අදියරේදී වරද පිළිගෙන නඩුව කෙටියෙන් අවසන් කිරීමට කැමැත්තෙන් සිටින බව දැනුම්දුන්හ.

භාණ්ඩ ඔවුන්ගේ අනුදැනුමකින් තොරව විකුණා ඇති බව ඔවුන් ප්‍රකාශ කළ අතර සහනයක් සහ අවම දඬුවමක් නියම කරන ලෙස ඉල්ලා සිටියහ.

දෙපාර්ශවයේම ඉදිරිපත් කිරීම් සළකා බැලීමෙන් පසු, අතිරේක මහේස්ත්‍රාත් ලහිරු සිල්වා සඳහන් කළේ සැකකරුවන් අධිකරණ කාලය නාස්ති කර නොමැති බවත් පළමු අවස්ථාවේදීම වරද පිළිගෙන ඇති බවත්ය.

ඒ අනුව, ඔහු එක් සැකකරුවෙකුට රුපියල් 200,000ක බැගින් දඩ නියම කළ අතර මුළු එකතුව රුපියල් 600,000ක් වී තිබිණි.