ආර්ථික අර්බුදය හේතුවෙන් විවිධ ගැටළු මතු වූ මාර්ග සංවර්ධන ව්‍යාපෘති රැසක් නැවත ආරම්භ කිරීමට පියවර ගෙන ඇති බව ජනාධිපති අනුර කුමාර දිසානායක පවසයි.

2026 මූල්‍ය වර්ෂය සඳහා වන විසර්ජන පනත් කෙටුම්පත පාර්ලිමේන්තුවට ඉදිරිපත් කරමින් ජනාධිපතිවරයා පැවසුවේ ගැටළු විසඳා මෙම ව්‍යාපෘති නැවත ආරම්භ කිරීමට පියවර ගෙන ඇති බවයි.

නැවත ආරම්භ කිරීමට නියමිත ව්‍යාපෘති මෙසේයි.

මධ්‍යම අධිවේගී මාර්ගයේ අදියර 1

මධ්‍යම අධිවේගී මාර්ගයේ කඩවත-මීරිගම කොටස ඉදිකිරීම සඳහා මූල්‍ය පහසුකම් සැපයීමට රජය තීරණය කර ඇත. සංවර්ධන කටයුතු දැනටමත් ආරම්භ කර ඇති අතර, 2026 වසර සඳහා රජය රුපියල් මිලියන 66.150ක් වෙන් කර ඇත.

මධ්‍යම අධිවේගී මාර්ගයේ අදියර 3

පොතුහැර-ගලගෙදර සිට මධ්‍යම අධිවේගී මාර්ගයේ අදියර 3 කොටසේ පොතුහැර-රඹුක්කන කොටසේ ඉදිකිරීම් 2027 පළමු කාර්තුවේදී අවසන් කිරීමට නියමිතය. රජය මේ සඳහා රුපියල් මිලියන 10,500ක් වෙන් කර ඇත.

මාර්ග සංවර්ධන අධිකාරියේ දේශීය අරමුදල් භාවිත කරමින් රඹුක්කන – ගලගෙදර කොටසේ ඉදිකිරීම් කටයුතු ආරම්භ කිරීමට යෝජනා කර ඇත. මේ සඳහා රජය රුපියල් මිලියන 20,000ක් වෙන් කර ඇත.

කටුගස්තොට – ගලගෙදර මාර්ග කොටස

කටුගස්තොට – ගලගෙදර මාර්ග කොටස පුළුල් කිරීම සඳහා අවශ්‍ය ශක්‍යතා අධ්‍යයන ලබන වසරේ ආරම්භ කිරීමට නියමිතය. මහනුවර බහුවිධ ප්‍රවාහන මධ්‍යස්ථානය ඉදිකිරීමට සමගාමීව, මහනුවර නගරයට යන ප්‍රවේශ මාර්ග කිහිපයක් පුළුල් කිරීම සහ වැඩිදියුණු කිරීම සඳහා මෙම අයවැයෙන් ප්‍රතිපාදන වෙන් කර ඇත.

කුරුණැගල – දඹුල්ල යෝජිත අධිවේගී මාර්ගය

යෝජිත කුරුණෑගල – දඹුල්ල අධිවේගී මාර්ගය සඳහා ඉඩම් අත්පත් කර ගැනීමේ ක්‍රියාවලිය සම්පූර්ණ කිරීම සඳහා රජය රුපියල් මිලියන 1000ක් වෙන් කර ඇති අතර එය දැනටමත් ආරම්භ කර ඇත.

රුවන්පුර අධිවේගී මාර්ගය – කහතුඩුව සිට ඉංගිරිය දක්වා පළමු කොටස

2018 දී සිදු කරන ලද ශක්‍යතා අධ්‍යයනය සමාලෝචනය කිරීම සහ අධ්‍යයනයෙන් ලබාගත් තොරතුරු තවදුරටත් විශ්ලේෂණය කිරීම මත පදනම්ව, කහතුඩුව සිට ඉංගිරිය දක්වා පවතින ප්‍රවේශ මාර්ගයේ වැඩිදියුණු කිරීම නැවත තක්සේරු කිරීමට යෝජනා කර ඇත. මේ සඳහා රජය රුපියල් මිලියන 1500ක් වෙන් කර ඇත.

කුළුණු මත ඉදිකෙරෙන වරාය ප්‍රවේශ අධිවේගී මාර්ගය සහ සමුද්‍රීය ධාවන දිගුව අතර සම්බන්ධතාව ඉදිකිරීම පිළිබඳ ශක්‍යතා අධ්‍යයනය

කුළුණු මත ඉදිකෙරෙන වරාය ප්‍රවේශ අධිවේගී මාර්ගයේ වරාය නගර අවසානය සහ සමුද්‍රීය ධාවන මාර්ගය අතර සම්බන්ධතාවයක් ඉදිකිරීම පිළිබඳ ශක්‍යතා අධ්‍යයනයක් සිදු කිරීම සඳහා රජය රුපියල් මිලියන 330ක් වෙන් කර ඇත.