අල්ලස් කොමිසම විසින් අත්අඩංගුවට ගැනීමට නියමිත දේශපාලනඥයින් 40 දෙනෙකුගේ ලැයිස්තුවක් ජනාධිපති ලේකම් කාර්යාලය විසින් නිකුත් කර ඇති බවට ජාතික නිදහස් පෙරමුණේ නායක විමල් වීරවංශ මහතා චෝදනා කර තිබේ.

රූපවාහිනී සම්මුඛ සාකච්ඡාවකදී අදහස් දක්වමින් හිටපු විමල් වීරවංශ හෙළිකර ඇත්තේ, එම ලැයිස්තුවේ රාජපක්ෂ සහ රනිල් වික්‍රමසිංහ පාලනයන්හි දේශපාලනඥයන්ගේ නම් අඩංගු බවයි.

අල්ලස් කොමිසමේ අධ්‍යක්ෂවරයකු ලැයිස්තුව සම්බන්ධයෙන් ගතයුතු ක්‍රියාමාර්ග පිළිබඳ උපදෙස් ලබාගැනීම සඳහා නිතිපතා ජනාධිපති ලේකම් කාර්යාලයට පැමිණෙන බව ඔහු තවදුරටත් පැවැසීය.

“මම ලැයිස්තුවේ ඉන්නවා. කාංචන විජේසේකර සහ රමේෂ් පතිරණත් ඉන්නවා. මහින්දානන්ද අලුත්ගමගේ දැනටමත් අත්අඩංගුවට අරගෙන. අමාත්‍යාංශ විෂය පථය යටතේ ඇති දෙපාර්තමේන්තු විසින් සිදුකරන ලද කරුණු සම්බන්ධයෙන් මෙම අත්අඩංගුවට ගැනීම් සිදුකෙරෙනවා.” යනුවෙන් ඔහු සඳහන් කළේය.

මෙම ලැයිස්තුව මැයි මාසයේ පළාත් පාලන මැතිවරණ ප්‍රතිඵලවලින් පසුව සකස් කරන ලද බව පවසමින්, දූෂණ චෝදනා සම්බන්ධයෙන් පුද්ගලයන් අත්අඩංගුවට නොගැනීම නිසා මැතිවරණයේදී ඡන්ද අහිමි වූ බව රජයේ අදහස බව ඔහු පැවැසීය.

නිවාස හා ඉදිකිරීම් අමාත්‍යවරයා ලෙස කටයුතු කළ කාලයට අදාළ කාරණයක් සම්බන්ධයෙන් තමා අල්ලස් කොමිසම හමුවට කැඳවා ඇති බව ද හිටපු අමාත්‍ය වීරවංශ අනාවරණය කළේය.