March 1, 2024
දේශපාලන පක්ෂ අතර ඇතිවිය හැකි මැතිවරණ සන්ධාන පිළිබඳ පවතින සාකච්ඡා මධ්‍යයේ, නියමිත ජනාධිපතිවරණයට පෙර මහ මැතිවරණයක් පැවැත්වීම සම්බන්ධයෙන් ආණ්ඩු පක්ෂයේ සහ විපක්‍ෂ කඳවුරුවල මන්ත්‍රීවරුන් පිරිසක් දැඩි කැමැත්තක් පළකර ඇතැයි වාර්තා වේ.
ආණ්ඩුක්‍රම ව්‍යවස්ථාවට අනුකූලව මෙම වසරේ අවසන් කාර්තුවේදී ජනාධිපතිවරණය පැවැත්වීමට නියමිතය.
කෙසේවෙතත් හදිසි මහ මැතිවරණයක් සඳහා ඕනෑම මොහොතක පාර්ලිමේන්තුව විසුරුවා හැරීමට රනිල් වික්‍රමසිංහ ජනාධිපතිවරයාට හැකියාව තිබේ.
එසේ තිබියදී ජනාධිපතිවරණය නියමිත පරිදි පැවැත්වීමට කටයුතු කරන බව ජනාධිපතිවරයා කිහිපවතාවක්ම ප්‍රකාශ කළේය.
ජාතික ජන බලවේගය වැනි දේශපාලන පක්ෂ දැනටමත් ජනාධිපතිවරණය සඳහා ප්‍රචාරක කටයුතු ආරම්භ කර ඇත.
කෙසේවෙතත්, ආණ්ඩුවේ ප්‍රධාන පක්ෂය වන ශ්‍රී ලංකා පොදුජන පෙරමුණ කියාසිටියේ ජනාධිපතිවරණයේදී ඕනෑම අපේක්ෂකයකුට සහාය දැක්වීම සම්බන්ධයෙන් තීරණයක් ගන්නේ භූමියේ තත්ත්වය හොඳින් ගණනය කිරීමෙන් පසුව බවයි.
ශ්‍රී ලංකා පොදුජන පෙරමුණ ජනාධිපතිවරණය සම්බන්ධයෙන් හදිසි නිගමනයකට එළඹෙන්නේ නැතැයි එම පක්ෂයේ ප්‍රකාශකයෙක් පවසා තිබේ.
“භූමියේ තත්ත්වය හොඳින් ගණනය කිරීමෙන් පසු අපි අපගේ ස්ථාවරය ප්‍රකාශ කරනවා ,” යැයි ඔහු සඳහන් කරයි.
දැනට රටින් බැහැරව සිටින පක්ෂයේ ප්‍රධාන මෙහෙයුම් නායකයා වන බැසිල් රාජපක්ෂ මාර්තු 5 වැනිදා යළි දිවයිනට පැමිණෙනු ඇත.
වැදගත් දේශපාලන තීරණ මාලාවකින් අනතුරුව අපේක්ෂකයාගේ පැමිණීම සිදුවන බව එම ප්‍රකාශකයා සඳහන් කරයි.
ඇතැම් මන්ත්‍රීවරුන් මේ වන විටත් ජනාධිපතිවරණයට පෙර මහ මැතිවරණයක් ඉල්ලා සිටින බව ද ඔහු තහවුරු කරයි.
ශ්‍රී ලංකා පොදුජන පෙරමුණ දැනට දෙකඩ වී ඇති අතර එහි මන්ත්‍රීවරුන්ගෙන් එක් කොටසක් ජනාධිපතිවරයාට පූර්ණ සහයෝගය ලබාදෙමින් මැතිවරණවලදී ඔහුගේ අපේක්ෂකත්වය සඳහා ප්‍රචාරක කටයුතුවල නිරත වේ.
ආණ්ඩුවේ ඇමැති වරප්‍රසාද දරන මන්ත්‍රීවරු මේ ගණයට අයත් වෙති.
ශ්‍රී ලංකා පොදුජන පෙරමුණේ මන්ත්‍රීවරුන්ගෙන් තවත් කොටසක් ඇමැති ධුර නොමැතිව ආණ්ඩුවේ රැඳී සිටින අතර, ඔවුන් සෘජුවම ජනාධිපතිවරයා සමඟ ගනුදෙනුවක් නැත.
ශ්‍රී ලංකා පොදුජන පෙරමුණින් තේරී පත් වූ මන්ත්‍රීවරුන්ගෙන් තුන්වැනි කොටස දැන් රැඳී සිටින්නේ විපක්ෂයේය.
ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී නිවාස හා නාගරික සංවර්ධන ඇමැති ප්‍රසන්න රණතුංග ජනාධිපතිවරණයේදී ජනාධිපති වික්‍රමසිංහට සහාය පළ කරන බව ප්‍රසිද්ධියේ ප්‍රකාශ කිරීමෙන් පසු ජනාධිපතිවරණය සම්බන්ධයෙන් ශ්‍රී ලංකා පොදුජන පෙරමුණේ බෙදීම පුළුල් වී තිබේ.
නිමල් ලාන්සා මන්ත්‍රීවරයාගේ නායකත්වයෙන් යුත් ශ්‍රී ලංකා පොදුජන පෙරමුණේ කණ්ඩායමද ජනාධිපතිවරයා වෙනුවෙන් ප්‍රචාරක කටයුතු ආරම්භ කර තිබේ.
පක්ෂ නායක මහින්ද රාජපක්‍ෂගේ පුත් නාමල් රාජපක්ෂ වැනි මන්ත්‍රීවරුන් ජනාධිපතිවරයාට සහාය පළකරමින් කරන මෙවැනි ප්‍රකාශවලින් ඈත්වීමට මෙය හේතුවී ඇත.
පාර්ලිමේන්තු මැතිවරණයක් සඳහා වූ නවතම ඉල්ලීම දේශපාලන අරමුණු වෙනුවෙන් ජනාධිපතිවරයාට බලපෑම් කිරීමේ තවත් උත්සාහයක් බව ඇතැම් විශ්ලේෂකයන්ගේ අදහසයි.
