July 29, 2025
රෝයල් පාර්ක් ඝාතන නඩුව සම්බන්ධයෙන් මරණ දඬුවම නියම වූ ජූඩ් ශමන්ත ජයමහ අත්අඩංගුවට ගැනීම සඳහා නිලධාරීන් රතු වරෙන්තුවක් ලබාගෙන ඇති බව නීතිපතිවරයා ඊයේ ශ්‍රේෂ්ඨාධිකරණයට දැනුම්දුන්නේය.
ජූඩ් ශමන්ත ජයමහට ජනාධිපති සමාවක් ලබාදීමට හිටපු ජනාධිපති සිරිසේන ගත් තීරණය අභියෝගයට ලක්කරමින් ගොනුකරන ලද මූලික අයිතිවාසිකම් පෙත්සමක් ශ්‍රේෂ්ඨාධිකරණය හමුවේ කැඳවූ අවස්ථාවේදී නීතිපතිවරයා වෙනුවෙන් පෙනීසිටි රජයේ නීතිඥවරයා මෙම හෙළිදරව්ව සිදුකළේය.
අධිකරණ නියෝගය ක්‍රියාත්මක කිරීමේ ප්‍රගතිය ඇගයීම සඳහා පෙත්සම ශ්‍රේෂ්ඨාධිකරණය හමුවේ කැඳවන ලදී.
2024 ජුනි 6 වැනි දින, රෝයල් පාර්ක් ඝාතන නඩුවේ වරදකරු වූ දොන් ශමන්ත ජූඩ් ඇන්තනි ජයමහට ජනාධිපති සමාවක් ලබාදීමට හිටපු ජනාධිපති මෛත්‍රීපාල සිරිසේන ගත් තීරණය අත්තනෝමතික සහ නීතියෙන් අවලංගු බව ශ්‍රේෂ්ඨාධිකරණය තීන්දු කළේය.
ජයමහ මරණ දඬුවම නියම වී සිටින වරදකරුවකු ලෙස සැළකෙන බැවින්, වාසය කරන රටකින් ඔහුව පිටුවහල් කිරීම සඳහා අවශ්‍ය පියවර ගන්නා ලෙස අධිකරණය නීතිපතිවරයාට සහ අදාළ සියලුම නිලධාරීන්ට තවදුරටත් නියෝග කළේය.
