September 17, 2026
පවතින එල් නිනෝ කාලගුණික තත්ත්වය හේතුවෙන් ඉදිරි දින දහය තුළ දිවයින පුරා සැලකිවයුතු වර්ෂාපතනයක් අපේක්ෂා කළ හැකි බව කාලගුණ විද්යා දෙපාර්තමේන්තුව විසින් අනතුරු ඇඟවීමක් සිදුකර තිබේ.
ඒ අනුව,ඉදිරි දිනවලදී තද වැසි, නායයෑම් සහ ගංවතුර තත්ත්වයන් ඇති වීමේ ඉහළ අවදානමක් පවතින බව කාලගුණ විද්යා දෙපාර්තමේන්තුවේ අධ්යක්ෂ ජෙනරාල් අජිත් විජේමාන්න පැවැසීය.
ජනමාධ්ය හමුවක් අමතමින් ඔහු ප්රකාශ කළේ, එල් නිනෝ තත්ත්වයට මුහුණ දීම සඳහා අවශ්ය සූදානමක් පවතින නමුත්, අයහපත් කාලගුණික තත්ත්වයන් ඉදිරි මාසවලදී තවදුරටත් තීව්ර විය හැකි බැවින් බලධාරීන් සහ මහජනතාව නිරන්තරයෙන් අවදියෙන් සිටිය යුතු බවයි.
සාම්ප්රදායිකව ඔක්තෝබර් සහ නොවැම්බර් මාස යනු බෙංගාල බොක්ක ආශ්රිතව අඛණ්ඩ කාලගුණික කැළඹිලි හටගන්නා කාලසීමාවක් වන අතර, එල් නිනෝ බලපෑම හමුවේ මෙම තත්ත්වය වඩාත් දරුණු අතට හැරී වර්ෂාපතනය ඉහළ යෑමත් සමඟ ගංවතුර සහ නායයෑම් අවදානම ඉහළ යා හැකි බව ඔහු පැවසීය.
දෙසැම්බර් මාසයේදී දිවයිනේ ඊසානදිග ප්රදේශවලට වැඩි වර්ෂාපතනයක් සහ උතුරු සහ නැගෙනහිර පළාත්වලට සාමාන්ය වැසි ලැබෙනු ඇතැයි අපේක්ෂා කරන බවත්, ඉන්දියානු සාගර ද්විප්රවේශ (IOD) තත්ත්වය හේතුවෙන් එම ප්රදේශවලද හදිසි ගංවතුර තත්ත්වයන් මතුවීමේ අවදානමක් පවතින බවත් හෙතෙම ප්රකාශ කළේය.
2027 වසරේ පෙබරවාරි සිට අප්රේල් දක්වා කාලය තුළ ඉහළ උෂ්ණත්වයක් සහ අඩු වර්ෂාපතනයක් අපේක්ෂා කළ හැකි බවත්, ඉදිරි මාසවලදී ජල සම්පත් ඉතා කල්පනාකාරීව සහ සැලසුම් සහගතව කළමනාකරණය කිරීමේ වැදගත්කම පිළිබදවත් ඔහු දැඩි ලෙස අවධාරණය කළේය.
