පිළිකා රෝගීන්ට ප්‍රතිකාර ලබා ගැනීම වඩාත් දැරිය හැකි මට්ටමකට පත් කිරීමේ අරමුණින්, පිළිකා ඖෂධ වර්ග 137ක මිල ගණන් 70%ක් දක්වා සැලකිය යුතු ලෙස අඩු කිරීමට ඉන්දියාව පියවර ගෙන තිබේ.

ඉන්දියාවේ ජාතික ඖෂධ මිලකරණ අධිකාරිය විසින් තෝරාගත් මෙම ඖෂධ සඳහා වන වෙළඳ ලාභ ආන්තිකය 30%කට සීමා කිරීමට තීරණය කිරීමත් සමඟ, මෙම නව මිල පාලන නීති 2026 නොවැම්බර් 9 වැනිදා සිට ක්‍රියාත්මක වීමට නියමිතය.

ඉන්දියානු රසායනික හා පොහොර අමාත්‍යාංශයට අනුව, මෙම තීරණය හේතුවෙන් පිළිකා රෝගීන් සහ ඔවුන්ගේ පවුල් මත පැටවෙන විශාල මූල්‍ය බර සැලකිය යුතු ලෙස පහත වැටෙනු ඇතැයි අපේක්ෂා කෙරේ.

පියයුරු, ප්‍රොස්ටේට්, මහාන්ත්‍ර, ඩිම්බකෝෂ සහ ගර්භාෂ ගෙල පිළිකා ඇතුළු පිළිකා වර්ග 20කට කට වැඩි ප්‍රමාණයකට ප්‍රතිකාර කිරීම සඳහා යොදාගන්නා ඖෂධ වර්ග රාශියක් මෙම මිල සහනය යටතේ ආවරණය වේ.

පුළුල් ලෙස භාවිත වන pembrolizumab, bevacizumab, durvalumab සහ osimertinib වැනි ප්‍රධාන පිළිකා නාශක ඖෂධ රැසක් ද මෙම නව නියාමනයන්ට ඇතුළත් කර ඇත.

නිල නිවේදනය නිකුත් කර දින හතක් ඇතුළත සංශෝධිත මිල ගණන් ඉදිරිපත් කරන ලෙස ඖෂධ නිෂ්පාදකයින්ට උපදෙස් දී ඇති අතර, නොවැම්බර් 9 වැනිදා සිට අදාළ අඩු කළ මිල ගණන් ක්‍රියාත්මක කිරීමට රෝහල් සහ ඖෂධ අලෙවිසැල් කටයුතු කළ යුතුය.

එසේම, ඖෂධ හිඟයක් ඇතිවීම වැළැක්වීම සඳහා දැනට පවතින නිෂ්පාදන සහ සැපයුම් මට්ටම් එලෙසම පවත්වාගෙන යන ලෙස බලධාරීන් විසින් ඖෂධ සමාගම්වලට උපදෙස් දී තිබේ. මීට පෙර 2019 වසරේදී ද ඉන්දියාව පිළිකා ඖෂධ 42ක වෙළඳ ලාභ ආන්තිකය සීමා කළ අතර, එහිදී ඖෂධ සන්නාම 526ක මිල ගණන් 90%ක් දක්වා පහත වැටිණි.

ඖෂධ බෙදාහැරීමේ සහ සිල්ලර අංශවල අධික ලාභ ලැබීම පාලනය කරමින්, පිළිකා ප්‍රතිකාර සඳහා ජනතාවට ඇති ප්‍රවේශය පුළුල් කිරීම මෙම මැදිහත්වීමේ ප්‍රධාන අරමුණ බව ඉන්දීය රජය ප්‍රකාශ කරයි.

කෙසේ වෙතත්, එක් එක් ඖෂධයේ දැනට පවතින මිල ව්‍යුහය මත පදනම්ව සැබෑ මිල අඩුවීමේ ප්‍රතිශතය වෙනස් විය හැකිය.