‘ගනේමුල්ල සංජීව’ ඝාතනය සම්බන්ධයෙන් දින 90ක රැඳවුම් නියෝගයක් යටතේ රඳවාගෙන සිටින සැකකාරියක වන නන්ද කුමාර් තක්ෂී සමඟ සමීප සම්බන්ධතා පැවැත්වූ බවට චෝදනා එල්ල වූ පොලිස් සැරයන්වරයකුගේ වැඩ තහනම් කර තිබේ.

පොලිස් පරීක්ෂණවලින් හෙළි වී ඇත්තේ සැරයන්වරයා සහ සැකකරු අභිනයෙන් අදහස් හුවමාරු කර ගනිමින් සංඥා භාවිත කරමින් සන්නිවේදනය කර ඇති අතර එක බිස්කට් එකක් දෙකට කඩා බෙදා ගැනීමට තරම් සමීපව කටයුතු කරමින් තොරතුරු හුවමාරු කරගෙන ති බවයි.

පෙබරවාරි 19 වැනිදා අලුත්කඩේ අධිකරණ සංකීර්ණයේදී ‘ගනේමුල්ල සංජීව’ වෙඩි තබා ඝාතනය කරන ලදී.

නඩුවේ ප්‍රධාන සැකකරු වන ඉෂාර සෙව්වන්දි මුලින් අතුරුදහන් වී සිටි අතර පසුව ඇයත් ඇයට සමීප සමානකමක් දක්වන නන්ද කුමාර් තක්ෂී ඇතුළු තවත් සැකකරුවන් හය දෙනෙකුත් නේපාලයේ කත්මණ්ඩු හි නිවසක සැඟවී සිටියදී අත්අඩංගුවට ගෙන ශ්‍රී ලංකාවට රැගෙනවිත් තිබිණි.

ඉෂාර සෙව්වන්දි සහ නන්ද කුමාර් තක්ෂී යන දෙදෙනාම දැනට දින 90ක රැඳවුම් නියෝගයක් යටතේ කොළඹ අපරාධ කොට්ඨාසයේ අත්අඩංගුවේ පසුවෙති.

වැඩ තහනම් කරන ලද පොලිස් සැරයන්වරයා නොවැම්බර් 30 වැනිදා රාත්‍රී 10:00 සිට පසුදා උදෑසන 6:00 දක්වා රාජකාරියේ යෙදී සිට තිබේ.

CCTV දර්ශන සමීපව පරීක්ෂා කිරීමේදී හෙළි වී ඇත්තේ නිලධාරියා අංක 03 සිර මැදිරියේ රඳවා සිටි නන්ද කුමාර් තක්ෂීට බිස්කට් එකක් ලබා දී අඩක් කෑ බිස්කට්ටුවෙන් කැබැල්ලක් ලබාගත් බවයි.

එම දර්ශනවල නිලධාරියා සැකකාරියගේ සිර මැදිරියට කිහිප වතාවක් ළඟා වී සංඥා මගින් ඇය සමඟ සන්නිවේදනය කරන ආකාරය ද දැකිය හැකි වී තිබේ.

කොළඹ අපරාධ කොට්ඨාසය මේ වන විට සිද්ධිය සම්බන්ධයෙන් පුළුල් පරීක්ෂණයක් පවත්වයි.