වෙන්නප්පුව පොලිස් ස්ථානයට යාබදව පිහිටි වැව මාර්ගයේ උදෑසන 10:30 ට පමණ වෙඩි තැබීමේ සිද්ධියක් වාර්තා වී ඇති බව පොලිසිය පවසයි.

පොලිසියට අනුව, මෝටර් රථයකින් පැමිණි පිරිසක් මෝටර් රථය යතුරුපැදියකට ගැටීමට සලස්වා අනතුරක් සිදුකර ඇත.

පසුව ප්‍රහාරකයන් තියුණු ආයුධයකින් යතුරුපැදිකරුවන්ට පහර දී ඔවුන්ට වෙඩි තබා ඇත.

යතුරුපැදිකරුවන්ගෙන් එක් අයකු තුවාල ලබා එම ස්ථානයෙන් පළායෑමට සමත්ව ඇති අතර, අනෙක් පුද්ගලයා වෙඩි වැදීමෙන් තුවාල ලබා එම ස්ථානයේදීම මියගොස් තිබේ.

මියගිය පුද්ගලයා වෙන්නප්පුව පොලිස් ස්ථානයේ සිට ආපසු යමින් සිටි බව වාර්තා වන අතර, ඔහුට මහාධිකරණයේ පැවැත්වෙන නඩුවක් සම්බන්ධයෙන් මාසිකව පොලිස් ස්ථානයට වාර්තා කිරීමට නියමව තිබී ඇත.

වෙඩි තැබීම රිවෝල්වර වර්ගයේ ගිනි අවියක් භාවිත කර සිදුකර ඇති බව පොලිසිය පවසයි.

මියගිය පුද්ගලයාට එරෙහිව පවරා ඇති නඩුවක් සම්බන්ධයෙන් අධිකරණ තීන්දුවක් 2025 සැප්තැම්බර් 9 වැනි දින ලබාදීමට නියමිත බව පොලිසිය පවසයි.