රාජ්‍යයට මූල්‍යමය පාඩු සිදු කිරීම සම්බන්ධයෙන් දූෂණ චෝදනා එල්ල වී ඇති චූදිතයන් විසින් එම පාඩු පොලිය සමඟ ආපසු ගෙවීම සඳහා කරන ලද ඉල්ලීම් සළකා බැලීමට අල්ලස් හෝ දූෂණ චෝදනා විමර්ශන කොමිසම එකඟ වී ඇත.

කෙසේවෙතත් එම ඉල්ලීම් අධිකරණය හරහා ඉදිරිපත් කර අධිකරණ අනුමැතිය ලබා ගත යුතුය.

රාජ්‍යයට මූල්‍යමය පාඩු සිදු කිරීම සම්බන්ධයෙන් චෝදනා ලැබ සිටින චූදිතයන් කිහිප දෙනෙකු මූල්‍යමය පාඩු පොලිය සමඟ ආපසු ගෙවීමට අවස්ථාවක් ලබා දෙන ලෙස කොමිසමෙන් ඉල්ලා සිටීමෙන් පසුව මෙම තීරණය දී තිබේ.

නඩු විභාගයකින් පසු වරදකරු වුවහොත් සිර දඬුවම් ලැබීම වළක්වා ගැනීම සඳහා විත්තිකරුවන් තම නඩු සමථයකට පත් කර ගැනීමට පොලිය සමඟ පාඩු ආපසු ගෙවීමට ඉල්ලීම් ඉදිරිපත් කර ඇත.

කෙසේවෙතත්, විමර්ශනයකින් වරදක් සිදු කර ඇති බවට සාක්ෂි හමු වුවහොත්, සෑම පැමිණිල්ලකටම අදාළව අධිකරණ නඩු ගොනු කිරීමට කොමිසම තීරණය කර ඇත.

මේ අනුව, චූදිතයකුට යම් සහනයක් අවශ්‍ය නම්, ඔහු හෝ ඇය එය සළකා බැලීම සඳහා අධිකරණයට ඉල්ලීමක් කළ යුතු බව කොමිසම දන්වා ඇත.

විත්තිකරුවන්ට චෝදනා පත්‍රයක් භාර දුන් පසු, ඔවුන් අත්විඳින ලද මූල්‍යමය පාඩුව ගෙවීමට සූදානම් නම්, නඩුව දිගටම කරගෙන නොයන ලෙස ඔවුන් කරන ඕනෑම ඉල්ලීමක් සළකා බැලීම සුදුසු බව කොමිසමේ අදහස බව වාර්තා වේ.

මූල්‍යමය පාඩුව පොලිය සමඟ ගෙවා දැමුවහොත්, නඩුව සඳහා වැය වන කාලය සහ එය දිගටම කරගෙන යෑමට අවශ්‍ය මුදල් යන දෙකම ඉතිරි වීම මෙයට හේතුවයි.

මෙම පියවර චෝදනාවලින් නිදහස් වීමට හේතු නොවන බැවින්, අධිකරණය විසින් ලිහිල් දඬුවමක් සළකා බැලිය හැකි බව කොමිසමේ අදහසයි.

පොලිය සමඟ මූල්‍යමය පාඩුවට අමතරව, විමර්ශනය සඳහා දරන ලද වියදම් මෙන්ම අධිකරණ වියදම් සඳහා ද ගෙවන ලෙස කොමිසම විත්තිකරුගෙන් ඉල්ලා සිටිනු ඇත.