විවිධ කණ්ඩායම් විසින් බඳවා ගන්නා ලද මෙරට හිටපු සොල්දාදුවන් සිය ගණනක් රුසියානු-යුක්රේන දේශසීමාවේ ඉදිරි වළල්ලේදී මිය යමින් සිටි බව එම කලාපයෙන් පැන ගිය සටන්කරුවකු විසින් හෙළිකර තිබේ.

රූපවාහිනී සම්මුඛ සාකච්ඡාවකදී ඔහු ප්‍රකාශ කළේ ශ්‍රී ලංකාවේ හිටපු සොල්දාදුවන් 200කට අධික සංඛ්‍යාවක් මියගොස් ඇතැයි විශ්වාස කෙරෙන අතර ඒ හා සමාන සංඛ්‍යාවක් ඩොනෙට්ස්ක් වැනි ප්‍රදේශවල රෝහල්වල ප්‍රතිකාර ලබන බවයි.

විශ්‍රාමික ජ්‍යෙෂ්ඨ හමුදා නිලධාරීන්ගෙන් සැදුම්ලත් බඳවා ගැනීමේ කණ්ඩායමකට රුපියල් ලක්ෂ 16ක් ගෙවා ‘කඳවුරු සහායකයන්’ ලෙස තමන් රුසියාවට ගිය බවත්වි ශ්‍රාමික සොල්දාදුවා පැවසීය.

මෙම බඳවා ගැනීමේ මෙහෙයුම පිටුපස රාජු රමේෂ් නමැති ඉන්දීය ජාතිකයකු සිටි බව පෙනී ගිය බවද ඔහු පැවසීය.

ඔවුන් රුසියාවේදී ද පිළිගෙන ඇත්තේ ද දෙමළ කතාකරන අයකු විසිනි.

සංචාරක වීසා මත පැමිණි ශ්‍රී ලාංකිකයන්, පසුව ‘වැග්නර්’ කුලී හේවා කණ්ඩායම සඳහා සහායකයන් ලෙස වසරක කොන්ත්‍රාත් කාලයක් සඳහා වන රුසියානු භාෂාවෙන් වූ ගිවිසුමකට අත්සන් කිරීම සඳහා පොළඹවා ගෙන ඇත්තේ නීතිඥවරියක ලෙස පෙනී සිටි ඉන්දියානු කාන්තාවක් විසින් බව ඔහු සඳහන් කළේය.

පසුව ඔහු සහ තවත් ශ්‍රී ලාංකිකයන් 33 දෙනෙකු රොස්තොව්හි පුහුණු කඳවුරකට රැගෙන ගොස් දින 14ක පාඨමාලාවක් සඳහා යොමුකර තිබේ.

තමන් සිටි කාලයේ පුහුණු කඳවුරේ ශ්‍රී ලාංකිකයන් 70ක් පමණ සිටි බව ඔහු සඳහන් කරයි.

පසුගිය මාස කිහිපය තුළ ශ්‍රී ලාංකිකයන් 600ත් 700ත් අතර ප්‍රමාණයක් රුසියාවට රැගෙන යන්නට ඇති බවත්, ඔවුන්ගෙන් වැඩි දෙනෙක් පසුගිය මාස තුන තුළ ගොස් ඇති බවටත් ඔහු විශ්වාසය පළකරයි.

දිනකට සංචාරක වීසා 10ත් 15ත් අතර ප්‍රමාණයක් කොළඹදී නිකුත් කරන බවද ඔහු පැවසීය.

විදේශ ඇමැති අලි සබ්රි ඊයේ වාර්තාකරුවන්ට පැවසුවේ රුසියාව හෝ යුක්‍රේනය වෙනුවෙන් සටන් කරන පුරවැසියන්ගේ සංඛ්‍යාව පිළිබඳ නිල වාරත් නොමැති නමුත් ඔවුන්ට උපකාර කිරීමට උත්සාහ කරන බවයි.

“ඔවුන්ගෙන් කිසිවකු විධිමත් හෝ නිල මාර්ග හරහා ගිහින් නැහැ. ඉතින් කෙතරම් පිරිසක් ගිහින්ද කියලා අපි අදන්නේ නැහැ” යනුවෙන් ඇමැති සබ්රි වාර්තාකරුවන්ට පැවසීය.

“අපි උත්සාහ කරන්නේ හැකි සෑම තැනකම අපට කළ හැකි දේ බලන්න. අපට වෙනත් ඕනෑම රටක රජයක් සමඟ ගනුදෙනු කළ හැකියි. විධිමත් ආණ්ඩුවක් නොවන කුලී හේවා කණ්ඩායමක් සමඟ කටයුතු කිරීම ඉතා දුෂ්කර කාර්යයක්. ” යනුවෙන් ඔහු සඳහන් කළේය.