පසුගිය අඟහරුවාදා (15) පැවැති කොළඹ දිස්ත්‍රික් සංවර්ධන කමිටු රැස්වීමේදී ඇති වූ සාකච්ඡාවලින් අනතුරුව, නුගේගොඩ ප්‍රදේශයේ පවතින දැඩි වාහන තදබදයට පිළියමක් ලෙස පොදු රථ ගාල් සැලැස්මක් සකස් කරන ලෙස අග්‍රාමාත්‍ය හරිනි අමරසූරිය මහත්මිය දැනුම් දී තිබේ.

නුගේගොඩ නගරයේ පවතින වාහන තදබදය, විශේෂයෙන්ම රථ ගාල් පහසුකම් නොමැතිකම, පාසල්වලට පැමිණෙන වාහන මාර්ගය දෙපස නතර කිරීම සහ නේවාසික ප්‍රදේශවල පවත්වාගෙන යනු ලබන පෞද්ගලික උපකාරක පන්ති නිසා ඇතිවන බලපෑම කෙරෙහි මෙම රැස්වීමේදී විශේෂ අවධානය යොමු විය.

විශේෂයෙන්ම නුගේගොඩ නගර මධ්‍යයේ පිහිටා ඇති ලයිසියම් අන්තර්ජාතික පාසලට දිනපතා සිසුන් රැගෙන එන වාහන වෙනුවෙන් ප්‍රධාන මාර්ගයේ මංතීරු තුනක් වසාදැමීමට සිදුවීම මෙහිදී සාකච්ඡාවට ලක්විය.

එසේම සාකච්ඡාව අතරතුරදී නිලධාරියෙකු පෙන්වාදුන්නේ, මාර්ග යනු වාහන ධාවනය සඳහා වන සේවාවක් වුවද, වර්තමානයේ ඒවා වැඩිවශයෙන් රථ ගාලක් ලෙස සහ වාණිජ කටයුතු සඳහා භාවිත වන බවයි. කාර්යබහුල ප්‍රදේශවල තදබදය අවම කිරීම සඳහා තට්ටු 10ත් 12ත් අතර උසකින් යුත් මහල් රථ ගාල් සංකීර්ණ ඉදිකිරීම සුදුසු බවට ද එම නිලධාරියා යෝජනා කළේය.

එම යෝජනාවට ප්‍රතිචාර දක්වමින් අග්‍රාමාත්‍ය අමරසූරිය විමසා සිටියේ මෙම ගැටලුවට විසඳුම් සෙවීම සඳහා පොදු රථ ගාල් සැලැස්මක් සකස් කළ හැකිද යන්නයි.

තවද, නුගේගොඩ පටු නේවාසික මාර්ගවල විශාල සිසුන් සංඛ්‍යාවක් සහ වාහන ගැවසීම නිසා තදබදය තවත් වැඩිවන බැවින් පෞද්ගලික උපකාරක පන්ති පවත්වාගෙන යාම පිළිබඳව ද මෙහිදී කනස්සල්ල පළවිය. එවැනි අධ්‍යාපනික ආයතන සඳහා අනුමැතිය ලබා දීමේදී රථ ගාල් පහසුකම් තිබේද යන්න පිළිබඳව ද සැලකිලිමත් විය යුතු බවට යෝජනා විය.

කොළඹ රාජකීය විද්‍යාලය සහ කාන්තා විද්‍යාලය වැනි පාසල් ආශ්‍රිතව ද මෙවැනිම රථ ගාල් කිරීමේ ගැටලු පවතින බව මෙම සාකච්ඡාවේදී වැඩිදුරටත් අනාවරණය විය.

කෙසේවෙතත්, නව රථ ගාල් සංකීර්ණ ඉදිකිරීම සම්බන්ධයෙන් අවසන් තීරණයක් මෙතෙක් ප්‍රකාශයට පත්කර නොමැත.