November 19, 2024
නව රජය රාජ්‍ය ඇමැතිවරුන්ගේ සංකල්පයෙන් බැහැර වීමට තීරණය කර තිබේ.
ඒ වෙනුවට ඉදිරි දින දෙක ඇතුළත නියෝජ්‍ය ඇමැතිවරුන් 26-28ත් අතර ගණනක් පත් කිරීමට නව රජය කටයුතු කරන බව වාර්තා වේ.
අලුතින් දිවුරුම් දුන් සෞඛ්‍ය හා ජනමාධ්‍ය ඇමැති වෛද්‍ය නලින්ද ජයතිස්ස කියා සිටියේ නියෝජ්‍ය ඇමැතිවරුන් පත්කිරීම නුදුරේදීම සිදුවනු ඇති බවයි.
මැතිවරණයට පෙර රටට ඉදිරිපත් කර ඇති ප්‍රතිපත්ති ප්‍රකාශනයේ දක්වා ඇති පරිදි රාජ්‍ය ඇමැතිවරුන් පත් නොකරන බව ඔහු පවසා ඇත.
ඇතැම් කැබිනට් ඇමැතිවරුන් සඳහා නියෝජ්‍ය ඇමැතිවරු පත් කෙරුණ ද සියලු අමාත්‍යාංශ සඳහා එලෙස නියෝජ්‍ය ඇමැති ධුර පත් නොකරනු ඇති බව ද වාර්තා වේ.
අමාත්‍යාංශ ලේකම්වරුන් ද මාරු කිරීමට, නැවත පත් කිරීමට හෝ අලුතින් පත් කිරීමට නියමිත නමුත් අවසන් තීරණය තවමත් ගෙන නොමැති බව ඇමැති වෛද්‍ය නලින්ද ජයතිස්ස පවසා ඇත.
කෙසේවෙතත්, මුදල් ලේකම්වරයා ලෙස මහින්ද සිරිවර්ධන තවදුරටත් තබා ගැනීමට රජය තීරණය කර තිබේ.
විදේශ ඇමැතිවරයා ලෙස යළි පත් වූ විදේශ ඇමැති විජිත හේරත් ඊයේ සිය ධුරයේ වැඩ භාර ගත් අතර වෛද්‍ය ජයතිස්ස අද තම කාර්යාලයේ දී වැඩ ආරම්භ කිරීමට නියමිතය.
