May 27, 2025
නිල සංචාරයක් සඳහා මෙරටට පැමිණ සිටින නවසීලන්ත නියෝජ්ය අග්රාමාත්ය සහ විදේශ කටයුතු අමාත්ය වින්සන්ට් පීටර්ස් (Vinston Peters) සහ ජනාධිපති අනුර කුමාර දිසානායක අතර හමුවක් ඊයේ (26) පස්වරුවේ ජනාධිපති කාර්යාලයේදි සිදුවිය.
පසුගිය ජනාධිපතිවරණයේදී මෙන්ම මහමැතිවරණයේදී ද ලැබු සුවිශේෂී ජයග්රහණ පිළිබඳ මෙහිදී ජනාධිපති අනුර කුමාර දිසානායක සහ නව ආණ්ඩුව වෙත නවසීලන්ත රජයේ සහ ජනතාවගේ සුබපැතුම් පිරිනැමූ නියෝජ්ය අග්රාමාත්යවරයා, දෙරට අතර දිගුකාලීන මිත්ර සබඳතා ඉතා ශක්තිමත් ලෙස තහවුරු කර ගැනීම තම රජයේ අරමුණ බවද කියාසිටියේය.
නව පාලනය යටතේ ශ්රී ලංකාවේ සිදුවෙමින් පවතින ධනාත්මක වර්ධනය පිළිබඳ සතුට පළකළ නවසීලන්ත නියෝජ්ය අග්රාමාත්යවරයා, දේශපාලන ස්ථාවරත්වය, ආර්ථික ස්ථාවරත්වය සහ සමාජ සංවර්ධනය වෙනුවෙන් රජය ගෙන යන වැඩපිළිවෙළ ඇගැයීමට ලක්කළේය.
එමෙන්ම රට නිවැරදි දිශාවට ගෙනයෑමේ ජනාධිපති අනුර කුමාර දිසානායකගේ නායකත්වය නියෝජ්ය අග්රාමාත්යවරයා පැසසුමට ලක්කළ අතර, ශ්රී ලංකාවට තිරසාර සංවර්ධනයක් උදාකිරීමට එම වැඩපිළිවෙළ ඉවහල් වනු ඇති බවට විශ්වාසය පළකළේය.
මෙම පසුබිම තුළ නවසීලන්ත රජය ශ්රී ලංකාවට ලබාදෙන මූල්ය සහාය ඉදිරියේදී තවදුරටත් පුළුල් කිරීමට අපේක්ෂා කරන බවද නියෝජ්ය අග්රාමාත්යවරයා සඳහන් කළේය.
මෙහිදී අදහස් දැක්වූ ජනාධිපති අනුර කුමාර දිසානායක, නවසීලන්ත නියෝජ්ය අග්රාමාත්ය වින්ස්ටන් පීටර්ස්ගේ මෙම සංචාරය ශ්රී ලංකා – නවසීලන්ත සබඳතාවල නව පරිච්ඡේදයක් සනිටුහන් කරනු ඇති බව සඳහන් කළේය.
එමෙන්ම ජනතාව අතර දිගු කලක් තිස්සේ පැවති බෙදීම් දිගුකාලීන ගැටුම්වලට හේතු වී ඇති බව පෙන්වාදුන් ජනාධිපතිවරයා, සංහිඳියාවේ වැදගත්කම පිළිබඳවද පැහැදිලි කළ අතර, තම රජය සංහිඳියා ක්රියාවලියේ ප්රධාන කුළුණ ලෙස ජාතික සමගිය ගොඩනැගීම සඳහා ප්රමුඛත්වය ලබා දී තිබෙන බව ප්රකාශ කළේය.
කෘෂිකර්මාන්ත, අධ්යාපන සහ සංචාරක යන ක්ෂේත්ර ඔස්සේ දෙරට අතර ද්විපාර්ශ්වික සහයෝගීතාව ඉහළ නංවාගැනීම පිළිබඳවද මෙහිදී දීර්ඝ ලෙස සාකච්ඡා කෙරුණු අතර දෙරටම අන්යෝන්ය වශයෙන් උනන්දුවක් දක්වන මෙම ක්ෂේත්රවල උන්නතිය වෙනුවෙන් සමීපව කටයුතු කිරීමටද මෙහිදී එකඟ වූහ.
කම්කරු අමාත්ය හා ආර්ථික සංවර්ධන නියෝජ්ය අමාත්ය ආචාර්ය අනිල් ජයන්ත ප්රනාන්දු, ජනාධිපති ජ්යෙෂ්ඨ අතිරේක ලේකම් රෝෂන් ගමගේ යන අය සහ නවසිලන්ත විදේශ කටයුතු සහ වෙළෙඳ අමාත්යාංශයේ ජ්යෙෂ්ඨ නිලධාරීහු පිරිසක් මෙම අවස්ථාට එක්ව සිටියහ.(PMD)
