August 9, 2023
දිවයිනේ ප්‍රධාන පෙළේ පාසල් පහක විදුහල්පතිවරුන්ගේ ස්ථාන මාරුවීම්වලට බලපෑමක් නොවන පරිදි, නව විදුහල්පති පත්වීම් ලබාදීමට නියමිත බව ලංකා ගුරු සංගමයේ ප්‍රධාන ලේකම් ජෝසප් ස්ටාලින් පවසයි.
එමෙන්ම කොළඹ රාජකීය විද්‍යාලය, කොළඹ ඩී. එස්. සේනානායක විද්‍යාලය, කොළඹ මහානාම විද්‍යාලය, හෝමාගම මහින්ද රාජපක්ෂ විද්‍යාලය සහ කුලියාපිටිය මධ්‍ය විද්‍යාලය වැනි ප්‍රමුඛ පෙළේ පාසල්වල විදුහල්පතිවරුන් ස්ථාන මාරුවීම් ලැයිස්තුවේ සඳහන් කර නොමැති බව ඔහු සඳහන් කරයි.
කෙසේ වෙතත්, සම්මුඛ පරීක්ෂණවලින් අනතුරුව ප්‍රමුඛ පෙළේ පාසල් 34ක් සඳහා විදුහල්පතිවරුන් තෝරාගෙන ඇති බවත්, එම තේරීම් පිළිබඳ අනුමැතිය ලබාගැනීම සඳහා රාජ්‍ය සේවා කොමිෂන් සභාව වෙත යවා ඇති බවත්, හෙතෙම සඳහන් කර ඇත.
එසේ වුවද එම ලැයිස්තුවේ සඳහන් වූ පාසල් විදුහල්පතිවරුන් පස් දෙනා තේරීම් කාරක සභා ලැයිස්තුවේ නොසිටි බවත්, නමුත් එම ලැයිස්තුව ප්‍රතික්‍ෂේප වූ අතර සම්පූර්ණ ලැයිස්තුවම තේරීම් කාරක සභාවට එවන ලෙස දැනුම් දී ඇති බවත්, ප්‍රධාන ලේකම්වරයා පවසයි.
අද (09) සිට කොළඹ රාජකීය විද්‍යාලයේ විදුහල්පති ධූරය පුරප්පාඩු වන අතර, හිටපු අධ්‍යාපන ඇමැති අකිල විරාජ් කාරියවසම් සමඟ සම්බන්ධකම් පැවැත්වූ අයෙක් එම ධූරයට පත් කිරීමට නියමිත බව වාර්තා වේ.
රාජකීය විද්‍යාලයේ විදුහල්පති තනතුරට තේරීපත් වූ පුද්ගලයා සම්මුඛ පරීක්ෂණයට සහභාගි වී නොමැති බවත්, ස්ථාන මාරුවීම් සඳහා අයදුම්පත් පවා ඉදිරිපත් කර නොමැති බවත්, ජෝසප් ස්ටාලින් සඳහන් කරයි.
මේ හේතුව නිසා රාජකීය විද්‍යාලයේ පුරප්පාඩුව සඳහා ඉදිරිපත්වූ විදුහල්පතිවරු දැඩි අසීරුතාවයකට පත්ව සිටිති.
කෙසේ වෙතත් සම්මුඛ පරීක්ෂණ ලැයිස්තුවේ නොමැති විදුහල්පතිවරයෙක් පත්කිරීමට ගෙන ඇති පියවරට එරෙහිව නීතිමය පියවර ගැනීමට ලංකා ගුරු සංගමය තීරණය කර ඇත.
එමෙන්ම අධ්‍යාපන අමාත්‍යාංශයේ ගුරු මාරුවීම් දෙපාර්තමේන්තුවට අලුතින් පත් වූ අධ්‍යක්ෂවරයාගේ ක්‍රියාමාර්ග හේතුවෙන් වාර්ෂික ගුරුමාරු වැඩසටහනේ දී ප්‍රමුඛ පෙළේ ජාතික පාසල් කිහිපයක ගුරු මාරුවීම් සිදු නොකළ බව ප්‍රධාන ලේකම්වරයා වැඩිදුරටත් පෙන්වාදෙයි.
