April 6, 2025
තමිල්නාඩු බොටම් ට්‍රෝලර් යාත්‍රා මෙරට උතුරු මුහුදු සීමාවට ඇතුළු වීම වැළැක්වීම සඳහා ශ්‍රී ලංකා රජය විසින් මෑතකදී ගන්නා ලද දැඩි පියවර කිහිපයක් නැවත සළකා බලන ලෙස ඉන්දීය අග්‍රාමාත්‍ය නරේන්ද්‍ර මෝදි ඉල්ලා තිබේ.
‘මානුෂීය හා ඵලදායී ප්‍රවේශයක්’ අනුගමනය කිරීමේ පදනම මත බොටම් ට්‍රෝලර් යාත්‍රා පිළිබඳ අවධානය යොමු කරන ලෙස ඔහු ඉල්ලා තිබේ.
ඉන්දීය විදේශ ලේකම් වික්‍රම් මිස්රි කොළඹ ටාජ් සමුද්‍රා හි පැවති මාධ්‍ය හමුවකදී පැවසුවේ අවසානයේ දී එය ධීවරයන්ට දෛනික ගැටලුවක් වන බවයි.
මෑත කාලයේ දී ගෙන ඇති ඇතැම් ක්‍රියාමාර්ග නැවත සළකා බැලිය හැකි බව අගමැති අවධාරණය කළ බව ද ඔහු සඳහන් කළේය.
ඉන්දීය විදේශ ලේකම්වරයාට අනුව, ධීවර ගැටලුව දෙපාර්ශ්වය අතර සැළකිව යුතු ලෙස විස්තරාත්මකව සාකච්ඡා කර තිබේ.
අගමැති මෝදි දිවයිනට පැමිණීමට පෙර, ශ්‍රී ලංකා මුහුදු සීමාවේ නීති විරෝධී බොටම් ට්‍රෝලර් යාත්‍රාවල නිරත වීම සම්බන්ධයෙන් අත්අඩංගුවට ගත් ඉන්දීය ධීවරයන් එකොළොස් දෙනෙකු නීතිපති දෙපාර්තමේන්තුවේ නිර්දේශයකින් පසු මානුෂීය පදනම මත සිකුරාදා නිදහස් කරන ලදී.
නිදහස් කරන ලද ධීවරයන් තමිල්නාඩුවේ රාමනාදපුරම් හි ඔවුන්ගේ උපන් ගමට ආපසු ගෙන්වා ගැනීමට ද පියවර ගෙන තිබිණි.
