February 9, 2024
උඩපලාත ප්‍රාදේශීය ලේකම් ගම්පල ආත්මා දිල්රුක්ෂිගේ වැඩ තහනම් කර නැවත සේවයේ පිහිටුවීම සම්බන්ධයෙන් මීට ටික වේලාවකට පෙර පාර්ලිමේන්තුවේදී උණුසුම් වචන හුවමාරුවක් ඇතිවිය.
රාජ්‍ය ඇමැති අනුරාධ ජයරත්න, විපක්ෂයේ ප්‍රධාන සංවිධායක ලක්ෂ්මන් කිරිඇල්ල සහ කථානායක මහින්ද යාපා අබේවර්ධන යන අය මෙම මතභේදාත්මක වාද විවාදවලට සම්බන්ධ වූහ.
උඩපළාත ප්‍රදේශයේ ඉදිකිරීම් කටයුතු සඳහා කොන්ත්‍රාත්කරුවකුට ගෙවීම් සිදුකිරීමට ප්‍රාදේශීය ලේකම්වරිය අපොහොසත් වූ බව පවසමින් රාජ්‍ය ඇමැති ජයරත්න අදහස් පළකළේය.
ජාතික උරුමයන් පිළිබඳ සංගමයෙන් ඇයව ඉවත් කළ බව පවසමින් ඇය ව්‍යාජ පුවතක් පළකර ඇති බවත්, එම මාරුවට තමාගේ සම්බන්ධයක් නොමැති බවත් රාජ්‍ය ඇමතිවරයා එහිදී අවධාරණය කළේය.
ඊට ප්‍රතිචාර දක්වමින් විපක්ෂයේ ප්‍රධාන සංවිධායක ලක්ෂ්මන් කිරිඇල්ල පවසන ලද්දේ, ප්‍රාදේශීය ලේකම්වරියට එරෙහි සියලු චෝදනාවලින් රාජ්‍ය සේවා කොමිෂන් සභාව ඇයව ඉවත් කිරීම, ඇය යළි සේවයේ පිහිටුවීමට හේතු වූ බවයි.
”රාජ්‍ය සේවා කොමිෂන් සභාව ප්‍රාදේශීය ලේකම්වරිය නැවත සේවයේ පිහිටුවා තිබුණා. මෙයින් අදහස් කරන්නේ කොමිසම ඇය නිර්දෝෂී ලෙස සැලකූ බවයි. එම කාරණය මත ප්‍රාදේශීය ලේකම්වරියට යුක්තිය ඉටුවිය යුතුයි.”
කිරිඇල්ල මන්ත්‍රීවරයා ප්‍රාදේශීය ලේකම්වරිය ආරක්ෂා කරන්නේ ඇයගේ සැමියා සමගි ජන බලවේගයේ ක්‍රියාකාරී සාමාජිකයකු වන නිසාත්, මහනුවර මහ නගර සභාවට නම් කර ඇති නිසාත් බව රාජ්‍ය ඇමැතිවරයා ප්‍රතිචාර දක්වමින් සඳහන් කළේය.
