ලංකා විදුලි සමාගමේ (LECO) හිටපු සභාපතිවරයා සඳහා ඇණවුම් කළ රුපියල් මිලියන 80 ක වාහනයක් සම්බන්ධයෙන් පාර්ලිමේන්තු මන්ත්‍රී රවී කරුණානායක පාර්ලිමේන්තුවේදී කනස්සල්ල පළකළේය.

“ප්‍රදර්ශනාගාරයේ අළු පැහැයෙන් යුත් රුපියල් මිලියන 70 ක් වටිනා වාහනයක් තිබුණා. නමුත් ඒ වෙනුවට කළු පැහැති වාහනයක් තෝරාගෙන තිබෙන අතර එහි මිල රුපියල් මිලියන 80 ක්. ඊට අමතරව, රුපියල් මිලියන 200 ක මුළු වියදමින් BYD මෝටර් රථ 10 ක් මිලදී ගෙන තිබෙනවා” යැයි රවී කරුණානායක මන්ත්‍රීවරයා පැවසීය.

ස්වාධීන ආයතනයක් ලෙස, වාහන මිලදී ගැනීම් සිදු කිරීමට LECO හට බලය ඇති බව ඔහු පිළිගත් නමුත්, වාහන සඳහා රජයේ වියදම් අඩුකර ඇති බවට අමාත්‍ය වසන්ත සමරසිංහගේ ප්‍රකාශය ප්‍රශ්න කළේය.

මෙම ප්‍රකාශයන්ට ප්‍රතිචාර දක්වමින් බලශක්ති අමාත්‍ය කුමාර ජයකොඩි පැවසුවේ මුලින් අයවැයෙන් වාහන 17 ක් සඳහා රුපියල් මිලියන 622 ක් වෙන්කර ඇති බවත්, පසුව එය රුපියල් මිලියන 466 දක්වා අඩුකර ඇති බවත්ය. මෙයට මෝටර් රථ හතක් සහ ඩබල් කැබ් රථ 10 ක් ඇතුළත්ය.

සභාපතිවරයාගේ වත්මන් BMW වාහනය නිතර අබලන් වන බවත්, අලුත්වැඩියා වියදම් රුපියල් මිලියන 2 සිට 3 දක්වා වැයවන බවත් ඇමැති ජයකොඩි පැහැදිලි කළේය.

නව ඇණවුම පිළිබඳව හිටපු සභාපතිවරයා නොදැන සිටි බවත්, එය ලබාදෙන විට ඔහු රටින් බැහැරව සිටි බවත් ඔහු පැවසීය.

“සමාගම ඔහුගේ අනුදැනුමකින් තොරව ඇණවුම ලබාදී තිබෙනවා. ඒ ගැන පරීක්ෂණයක් සිදුවෙමින් පවතිනවා. ඇණවුම අවලංගු කිරීමට උපදෙස් නිකුත් කර තිබෙනවා. මෙම සිද්ධිය සමඟ ඔහුගේ නම සම්බන්ධ කිරීම අසාධාරණයි,” ඇමැති ජයකොඩි පැවසීය.