June 7, 2025
යහපාලන ආණ්ඩුව සමයේ අග්‍රාමාත්‍ය කාර්යාලය යටතේ ක්‍රියාත්මක වූ දූෂණ විරෝධී කමිටු කාර්යාලයේ වැදගත් ලිපිගොනු කිහිපයක් අතුරුදහන් වී ඇති බව අග්‍රාමාත්‍ය හරිනි අමරසූරිය පාර්ලිමේන්තුවට දැනුම්දුන්නාය.
පාර්ලිමේන්තු මන්ත්‍රී චාමර සම්පත් දසනායක විසින් මතුකරන ලද ප්‍රශ්නයකට පිළිතුරු දෙමින් අග්‍රාමාත්‍යවරිය පැවසුවේ, පැමිණිලි වාර්තා සහ කමිටුවේ සාමාජිකයකු සම්බන්ධ අනතුරකට අදාළ ලිපිගොනු ඇතුළු ප්‍රධාන ලිපිගොනු සළකා බලා නොමැති බවයි.
“ගොනුවලට සිදුවූයේ කුමක්දැයි අපි දන්නේ නෑ. හිටපු අග්‍රාමාත්‍ය රනිල් වික්‍රමසිංහ 2022 දී ජනාධිපති ධුරයට පත් වූ විට ඒවා ඉවත් කළේ කියලා අපි දැනුවත් නෑ” අග්‍රාමාත්‍යවරිය පාර්ලිමේන්තුවට පැවසුවාය.
දූෂණ විරෝධී කමිටුව 2015 දී කැබිනට් අනුමැතිය ඇතිව පිහිටුවන ලද බව ඇය පැවසුවාය.
එවකට අග්‍රාමාත්‍යවරයා ලෙස කටයුතු කළ රනිල් වික්‍රමසිංහ එහි සභාපතිවරයා ලෙස කටයුතු කළේය.
වත්මන් ජනාධිපති අනුර කුමාර දිසානායකද අමාත්‍ය ආනන්ද විජේපාල සමඟ කමිටුවේ සාමාජිකයෝ ලෙස කටයුතු කළහ.
අනෙකුත් කැපීපෙනෙන සාමාජිකයින් අතර මංගල සමරවීර, විජයදාස රාජපක්ෂ, ආර්. සම්බන්ධන්, ෆීල්ඩ් මාර්ෂල් සරත් ෆොන්සේකා, එම්. ඒ. සුමන්තිරන්, ජේ. සී. වැලිඅමුණ, ජයම්පති වික්‍රමරත්න සහ මලික් සමරවික්‍රම විය.
“ජනාධිපති දිසානායක කමිටුවේ සාමාජිකයෙකු වූ බව ප්‍රසිද්ධ කාරණයක්. ඔහු අවස්ථා කිහිපයකදීම ඒ ගැන ප්‍රසිද්ධියේ කතාකර තිබෙනවා” අගමැතිවරිය තවදුරටත් පැවසීය.
