ඉන් විට්‍රෝ ෆර්ටිලයිසේෂන් (IVF) ලෙස හැඳින්වෙන නල දරු ප්‍රතිකාරය කොළඹ කාසල් වීදියේ කාන්තා රෝහලේදී හඳුන්වා දීමට සූදානම් වේ.

රජයේ රෝහලක එවැනි උසස් සාඵල්‍යතා සේවාවන් ලබාගත හැකි පළමු අවස්ථාව මෙය වනු ඇත.

කාසල් වීදියේ කාන්තා රෝහලේ අධ්‍යක්ෂ වෛද්‍ය අජිත් කුමාර දන්තනාරායන පවසන්නේ මෙම මුලපිරීම මගින් සාඵල්‍යතා සත්කාර සඳහා ප්‍රවේශය සැළකිව යුතු ලෙස පුළුල් කරන බවයි.

“නව පහසුකම ඉදිරි මාස තුන ඇතුළත ක්‍රියාත්මක කරන්න අපේක්ෂා කරනවා. මෙය මහජන සෞඛ්‍ය සේවා පද්ධතිය හරහා උසස් ප්‍රජනක සෞඛ්‍ය සේවා සැපයීමේ වැදගත් පියවරක්. මිල අධික පෞද්ගලික ප්‍රතිකාර සඳහා මුදල් වැය කිරීමට නොහැකි ජෝඩුවලට ඔවුන්ගේ මාපිය සිහිනය සැබෑ කර ගැනීමට සාධාරණ අවස්ථාවක් ලබා දීම අපගේ අරමුණයි,” යනුවෙන් ඔහු පැවසීය.

වර්තමානයේ, නල දරු සේවා පිරිනමනු ලබන්නේ ශ්‍රී ලංකාවේ සීමිත පෞද්ගලික රෝහල් ගණනකින් පමණක් වන අතර, ප්‍රතිකාර පිරිවැය චක්‍රයකට රුපියල් මිලියන 2 සිට රුපියල් මිලියන 3 දක්වා පරාසයක පවතී.

IVF යනු ශරීරයෙන් පිටත රසායනාගාරයකදී ශුක්‍රාණු සමඟ ඩිම්බයක් සංසේචනය කර ගර්භාෂයට මාරු කරන වෛද්‍ය ක්‍රියාපටිපාටියකි.

අවහිර වූ පැලෝපීය නාල, අඩු ශුක්‍රාණු ගණන, හෝමෝන ආබාධ හෝ පැහැදිලි කළ නොහැකි මදසරු බව වැනි තත්ත්වයන් නිසා ඇතිවන මදසරු බවට ප්‍රතිකාර කිරීම සඳහා එය බහුලව භාවිත වේ.

මදසරුභාවය ජෝඩු ගණනකට බලපාන අතර සැළකිව යුතු චිත්ත පීඩා හා සමාජීය බලපෑම් ඇති කළ හැකි බැවින්, රාජ්‍ය අංශයේ IVF සේවා පැවතීම අත්‍යවශ්‍ය යැයි සැළකේ.