ගල්කිස්ස මහේස්ත්‍රාත් අධිකරණ පරිශ්‍රය තුළ සිදුවීම සම්බන්ධයෙන් ජ්‍යෙෂ්ඨ නීතිඥ ගුණරත්න වන්නිනායකට අධිකරණයට අපහාස කිරීමේ චෝදනාව එල්ල කළ හැකිද යන්න පිළිබඳ පොලිසිය නීතිපති දෙපාර්තමේන්තුවෙන් විමසීමට නියමිතය.

පොලිස් මාධ්‍ය ප්‍රකාශක සහකාර පොලිස් අධිකාරී එෆ්. යූ. වූට්ලර් පවසන්නේ මේ සඳහා ඇති නීතිමය මාර්ග මොනවාදැයි සොයා බැලීම සඳහා පොලිසිය නීතිපති දෙපාර්තමේන්තුවේ සහාය ලබා ගන්නා බවයි.

“නීතිඥ වන්නිනායකට චෝදනා එල්ල වී ඇති වැරදි සඳහා අපි දැනට බී වාර්තාව කෙටුම්පත් කරමින් සිටිනවා. බී වාර්තාව මහේස්ත්‍රාත්වරයා වෙත ඉදිරිපත් කළ පසු, අධිකරණයට අපහාස කිරීමේ චෝදනාව එල්ල කිරීමේදී නීතිපති දෙපාර්තමේන්තුවේ සහාය ලබා ගන්නවා,” සහකාර පොලිස් අධිකාරී වූට්ලර් පැවසීය.

ඔක්තෝබර් 10 වැනිදා ගල්කිස්ස මහේස්ත්‍රාත් අධිකරණයේදී පොලිස් කොස්තාපල්වරයකු සහ තමා අතර ඇති වූ ආරවුලකින් පසු රාජකාරියේ යෙදී සිටි රජයේ සේවකයකුට බාධා කිරීමේ චෝදනාව මත වන්නිනායකට දණ්ඩ නීති සංග්‍රහයේ 183 සහ 334 වගන්ති යටතේ චෝදනා එල්ල වී ඇති බව පොලිස් මාධ්‍ය ප්‍රකාශකවරයා පැවසීය.

වන්නිනායක සහ පොලිස් කොස්තාපල්වරයා ඇප මත මුදා හැර තිබේ.

අධිකරණ ක්‍රියාමාර්ග සහ සිරිත් විරිත්වලට ගරු නොකරන ඕනෑම පුද්ගලයකු අධිකරණ නිලධාරීන් හෝ අධිකරණය තුළ අදාළ පොලිස් ස්ථානයේ නිලධාරීන් විසින් මහේස්ත්‍රාත්වරයාට වාර්තා කළ යුතු බවත්, සිද්ධිය අතරතුර එසේ කිරීමට අපොහොසත් වූ මූලස්ථාන පොලිස් පරීක්ෂකවරයාට එරෙහිව පියවර ගෙන ඇති බවත් සහකාර පොලිස් අධිකාරී වූට්ලර් පැවසීය.