October 20, 2026
ඉස්ලාමීය සහයෝගිතා සංවිධානය පටු දේශපාලන ප්‍රචාරණ කටයුතු සඳහා යොදාගැනීමට ඉඩ නොදී, එම සංවිධානය තුළ ව්‍යුහාත්මක ප්‍රතිසංස්කරණ සිදුකිරීම කෙරෙහි අවධානය යොමුකරන ලෙස ඉන්දියාව එහි සාමාජික රටවලින් ඉල්ලා සිටියි.
ඉස්ලාමීය සහයෝගිතා සංවිධානයේ සමුළුවේදී ජම්මු සහ කාශ්මීරය සම්බන්ධයෙන් සම්මත කරගත් යෝජනාවල සඳහන් කරුණු ඉන්දියාව විසින් තරයේ ප්‍රතික්ෂේප කර ඇත.
පාකිස්ථානය සිය අභ්‍යන්තර ගැටලුවලින් ජාත්‍යන්තර අවධානය වෙනතකට යොමු කිරීම සඳහා සහ ඉන්දියාවට එරෙහි ප්‍රචාරණ කටයුතු සඳහා මෙම සංවිධානය භාවිත කරන බවටද ඉන්දියාව චෝදනා කරයි.
2026 ඔක්තෝබර් 17 සහ 18 යන දිනවල බැග්ඩෑඩ් නුවරදී පැවැති OIC විදේශ අමාත්‍යවරුන්ගේ කවුන්සිල රැස්වීමෙන් අනතුරුව, ඉන්දීය විදේශ කටයුතු අමාත්‍යාංශය සඳුදා දින නිල ප්‍රකාශයක් නිකුත් කරමින් මෙම ප්‍රතිචාරය දක්වා තිබේ.
එහිදී ජම්මු සහ කාශ්මීරය සම්බන්ධයෙන් කරන ලද ප්‍රකාශ “වෛරී සහගත, පාර්ශවග්‍රාහී සහ අසත්‍ය” ලෙස හඳුන්වා දුන් නවදිල්ලිය, පාකිස්ථානයේ දේශපාලන අරමුණු වෙනුවෙන් ක්‍රියා කිරීමට මෙම සංවිධානය නැවතත් ඉඩ දී ඇති බව පෙන්වා දුන්නේය.
