August 29, 2024
ශ්‍රී ලංකාව තුළ මෑත වසරවලදී ශ්වසන පද්ධතිය ආශ්‍රිත රෝගවල වැඩිවීමක් පිළිබඳ අවධානය යොමුකර ඇති බව සෞඛ්‍ය ලේකම් වෛද්‍ය පාලිත මහීපාල පවසයි.
ජාතික සෞඛ්‍ය හා සත්කාර පර්යේෂණ ආයතනයේ ශ්වසන සෞඛ්‍ය පිළිබඳ ගෝලීය සෞඛ්‍ය පර්යේෂණ ඒකකයේ වාර්ෂික විද්‍යාත්මක රැස්වීමේදී අදහස් දක්වමින් වෛද්‍ය මහීපාල පැවසුවේ ශීඝ්‍ර නාගරීකරණය, වායු දූෂණය සහ දේශගුණික විපර්යාස වැනි සාධක මෙම වැඩිවීමට හේතු වී ඇති බවයි.
ජනගහනය අතර විද්‍යාත්මක දැනුම නොමැතිකම, අඩු අධ්‍යාපන මට්ටම් සහ දරිද්‍රතාව ශ්වසන රෝග ව්‍යාප්ත වීමට හේතු වන බව ද වෛද්‍ය මහීපාල පෙන්වා දුන්නේය.
මෙම සෞඛ්‍ය ගැටලුවලට එරෙහිව සටන් කිරීම සඳහා වැඩි දැනුවත් කිරීමක් සහ අධ්‍යාපනයක් අවශ්‍ය බව ඔහු අවධාරණය කළේය.
දින තුනක් පුරා පැවැත්වෙන මෙම රැස්වීමට ලොව පුරා සිටින ශ්වසන සෞඛ්‍ය විශේෂඥයන් කොළඹට පැමිණ තිබේ.
ආසියානු කලාපය තුළ ශ්වසන රෝග අවදානම අවම කිරීමේ අරමුණින් විවිධ වැඩසටහන් ආරම්භ කිරීම මෙහි අරමුණයි.
42.31%
