ආචාර්ය සුමිත්‍රා පීරිස්ගේ සම්මානනීය සිනමා නිර්මාණයක් වන, 1978දී නිෂ්පාදිත ගැහැණු ළමයි චිත්‍රපටය, ලබන සතියේ ආරම්භ වන 78 වැනි කෑන්ස් සිනමා උළෙලේ Cannes Classics අංශය සඳහා තෝරාගෙන ඇත.

ලෙස්ටර් ජේම්ස් පීරිස් සහ සුමිත්‍රා පීරිස් පදනම සමඟ එක්ව L’Immagine Ritrovata රසායනාගාරයේ ෆිල්ම් හෙරිටේජ් පදනම විසින් චිත්‍රපටය 4K තාක්ෂණය ඔස්සේ ප්‍රතිසංස්කරණය කර තිබේ.

ශ්‍රී ලංකාවේ, මාලදිවයිනේ සහ ඉන්දියාවේ ප්‍රංශ තානාපති කාර්යාලවල සහාය ඇතිව ප්‍රංශ-ඉන්දු-ශ්‍රී ලංකා සිනමා උරුමය (FISCH) වැඩසටහන යටතේ ලබාදුන් ප්‍රදානයක් හරහා ප්‍රතිසංස්කරණය සඳහා අරමුදල් සපයා ඇත.

චිත්‍රපටයේ ප්‍රධාන නිළි වසන්ති චතුරානි, ප්‍රධාන නළු අජිත් ජිනදාස, චිත්‍රපට උරුම පදනමේ අධ්‍යක්ෂ ශිවේන්ද්‍ර සිං දුංගර්පූර් සහ ලෙස්ටර් ජේම්ස් පීරිස් සහ සුමිත්‍රා පීරිස් පදනමේ සභාපති ගයත්‍රි මුස්තාචි මෙම ප්‍රදර්ශනයට සහභාගී වීමට නියමිතව ඇත.

ගැහැණු ළමයි චිත්‍රපටය බෙංගාලි භාෂා ඉන්දීය චිත්‍රපටයක් වන සත්‍යජිත් රායිගේ Aranyer Din Ratri සමඟින් ප්‍රදර්ශනය කෙරේ.